ശബരിമല മകരവിളക്ക് നാളെ

..........................................

ശബ​രി​മല സ്‌നേഹ​ത്തിന്റെയും സമ​ത്വ​ത്തി​ന്റെയും സംഗ​മ​ഭൂ​മി​യെ​ന്ന​പോലെ ദേശീ​യ​ബോ​ധ​ത്തിന്റെ ഉൾക്ക​രു​ത്തു​പ​ക​രുന്ന ഏറ്റവും പ്രമു​ഖ​മായ അദ്ധ്യാ​ത്മ​കേ​ന്ദ്ര​വുമാണ് . നാടിന്റെ നാനാ​ഭാ​ഗ​ങ്ങ​ളിൽ നി​ന്നെ​ന്ന​ല്ല, അന്യ​ദേ​ശ​ങ്ങ​ളിൽ നി​ന്നു​പോലും ഇവി​ടേ​യ്‌ക്കൊ​ഴു​കുന്ന തീർത്ഥാ​ട​ക​സ​മൂഹം ശബ​രി​മ​ല​യുടെ പ്രാധാ​ന്യം എടു​ത്തു​കാ​ണി​ക്കു​ന്നു.
ഈശ്വ​ര​ഹി​ത​ത്തിനു വിപ​രീ​ത​മായി മനു​ഷ്യന്റെ സങ്കു​ചി​ത​മായ ജാതി​-​മത വിരോ​ധ​ങ്ങൾക്ക് വിരാമം കുറി​ക്കാനും അതിന്റെ അർത്ഥ​ശൂ​ന്യ​ത​യി​ലേക്ക് വിരൽചൂ​ണ്ടാനും ശക്ത​മായ ഉദ്‌ബോ​ധ​ന​മാണ് ശബ​രി​മല തീർത്ഥാ​ടനം നൽകുന്നത്.
തിരു​വി​താം​കൂ​റിന്റെ ക്ഷേത്ര​ച​രിത്ര സൗന്ദ​ര്യ​ങ്ങ​ളിൽ നിന്നും തികച്ചും വേറി​ട്ടു​നിൽക്കുന്ന ശബ​രി​മ​ല​ക്ഷേ​ത്രവും തീർത്ഥാ​ടന മഹി​മയും ഭക്ത​ജ​നങ്ങൾക്ക് അനു​ഗ്ര​ഹവും അഭയ കാര​ണ​വു​മാ​ണ്.
മനു​ഷ്യൻ പ്രകൃ​തി​യു​മായി സമ​ന്വ​യിച്ചും പ്രകൃ​തിയെ ആദ​രിച്ചും നിഷ്ഠ​യോ​ടെ​യുള്ള ജീവി​ത​രീ​തിക്ക് പ്രേര​ക​മാ​യി​മാ​റുന്ന ശബ​രി​മല തീർത്ഥാ​ടനം നൈഷ്ഠിക ബ്രഹ്മ​ചാ​രി​യായ ശ്രീഅ​യ്യ​പ്പന്റെ കൃപാ​തി​രേ​ക​ത്തിനു മുന്നി​ലാ​ണെ​ന്നതും സവി​ശേഷ ശ്രദ്ധ കൈവ​രിക്കാൻ ഇടയാക്കുന്നു.

മത​സൗ​ഹൃ​ദ​ത്തി​ന്റെയും മാനവ മൈ​ത്രി​യു​ടെയും ദേശാ​ദ​ര​ത്തി​ന്റെയും തീർത്ഥാ​ടന മഹി​മ​യാണ് ഇവിടെ പ്രസ്പ​ഷ്ട​മാ​കു​ന്ന​ത്. ഏക​ഭാ​വ​ത്തോടെ ഭക്തനെ കാണു​കയും സ്വീക​രി​ക്കു​കയും സത്ക്ക​രി​ക്കു​കയും ചെയ്യു​ന്ന, അന​ന്യ​സാ​ധാ​ര​ണ​മായ ആദർശ​പ​ര​ത​യുടെ അനു​ഭൂതി പക​രുന്ന ഈ മഹാ​സ​ന്നി​ധാനം ലോക​ത്തി​നു​തന്നെ മഹ​നീയ മാതൃ​ക​യാ​ണ്.
ധർമ്മ​ത്തിന്റെ അർത്ഥ​മെ​ന്തെന്നും അർത്ഥ​ത്തിന്റെ വ്യാപ്തി​യെ​ന്തെന്നും അഹം​ചി​ന്ത​യുടെ അതി​രു​കൾ എവി​ടെ​ വ​രെ​യെന്നും ആത്മ​ധ​ന്യ​താ​പ​ര​മായ നേട്ട​ങ്ങൾ എങ്ങനെ വന്നു​ചേ​രു​ന്നു​ എ​ന്നു​മെല്ലാം ഇവിടെ നമുക്ക് കാണാം. മാന​വ​സേ​വ​യാണ് യഥാർത്ഥ മാധ​വ​സേ​വ​യെന്ന് മനു​ഷ്യനെ ഓർമ്മി​പ്പി​ക്കുന്ന ഈ മകരവിളക്ക് മഹോത്സവം അഹ​ത്തിൽ അധി​വ​സി​ക്കുന്ന ബ്രഹ്മത്തെ നമുക്ക് കാട്ടി​ത്ത​രു​ന്നു.
കോടാ​നു​കോടി ഭക്ത​ജ​ന​ങ്ങ​ളുടെ ജീവിത പുണ്യ​മു​ഹൂർത്ത​വേ​ള​യാ​ണി​ത്. ജാതി​യുടേതായ വിഭാ​ഗീ​യ​ത​കളും മത​ത്തിന്റെ പേരി​ലുള്ള അനാ​ദ​ര​ങ്ങ​ളും​ കൊണ്ട് കലു​ഷി​ത​മാ​യി​ക്കൊ​ണ്ടി​രി​ക്കുന്ന സമൂ​ഹ​മ​ദ്ധ്യ​ത്തിൽ ഭക്തി​യുടെ ഭാവ​ത്തിൽനി​ന്നു​കൊണ്ട് ഹൃദ​യ​ശു​ദ്ധി​ക്കുള്ള വിള​ക്കു​തെ​ളി​ക്കു​ക​യാണ് ഓരോ ഭക്തനും ഇവിടെ ചെയ്യു​ന്ന​ത്. അശ​ര​ണർക്ക് ആശ്ര​യവും അന്വേ​ഷ​കർക്ക് വഴി​കാ​ട്ടിയും ആത്മ​ശു​ദ്ധി​യു​ള്ള​വന് സുഹൃത്തും സന്യാ​സിക്ക് ആത്മ​ബോ​ധ​വു​മായി ശ്രീ ശ​ബ​രീ​ശൻ പ്രകാ​ശ​മ​രു​ളു​ന്നു.
ക്ഷേത്രപ്രവേ​ശന വിളം​ബ​ര​ത്തിനു മുൻപു​തന്നെ മത​വി​ദ്വേ​ഷ​ത്തി​ന്റെയും സമ​ഭാ​വ​ന​യു​ടെയും ഏകീ​ക​ര​ണ​ത്തിന്റെ ശംഖ​ധ്വനി ശബ​രീ​ശ ​സ​ന്നി​ധി​യിൽ മുഴ​ങ്ങി​യി​രു​ന്നു. അതിന്റെ ഉത്ത​മോ​ദാ​ഹ​ര​ണ​മാണ് എരു​മേലി. എരു​മേ​ലി​ പേട്ടതുള്ളൽ ചരിത്രപ്രസി​ദ്ധ​മാ​ണല്ലോ!
ശബ​രിമല തീർത്ഥാ​ടനം ഉൽക്കൃ​ഷ്ട​മായ ഒരു ജീവി​ത​ച​ര്യ​യാ​ണ്. മന​സിന്റെ മാലിന്യം ഇല്ലാ​താ​ക്കാ​നുള്ള ശര​ണം​വി​ളി​യിൽ ശര​ണാ​ഗ​ത​ ര​ക്ഷ​ക​നായ ശബ​രീ​ശൻ അശ​ര​ണ​കോ​ടി​കളെ അനു​ഗ്ര​ഹിച്ചു ചേർത്തു​നി​റു​ത്തു​മ്പോൾ ജന​മ​ന​സുക​ളിൽ ഉൽക്കൃഷ്ട ചിന്ത​യുടെ സുവർണ സൂര്യോ​ദ​യ​മായി മക​ര​ന​ക്ഷത്രം ഉദി​ച്ചു​യ​രു​ന്നു.
ധനു​രാ​ശി​യിൽ നിന്ന് സൂര്യ​തേ​ജസ് മകരം രാശി​യി​ലേക്ക് സംക്ര​മി​ക്കുന്ന ഈ വേള​യിൽ ചിന്ത​കൊണ്ടും വാക്കു​കൊണ്ടും പ്രവൃ​ത്തി​കൊണ്ടും ഇതി​നെല്ലാം നിദാ​ന​മായ ആത്മ​ശു​ദ്ധി​കൊണ്ടും നമുക്ക് ഒന്നു​ചേ​രാൻ കഴി​യട്ടെ എന്ന് പ്രാർത്ഥി​ക്കാം.