തിരുവനന്തപുരം: കൊവിഡ് കാലത്തുണ്ടായ പ്രതിസന്ധി മറികടക്കാൻ ചെറുകിട സംരംഭകർക്ക് വൈദ്യുത മേഖലയിൽ പ്രത്യേക ഇളവുകൾ നൽകുമെന്ന് മന്ത്രി എം.എം. മണി പറഞ്ഞു. മെട്രോ എം.എസ്.എം.ഇ അവാർഡ് വിതരണം ചെയ്തു സംസാരിക്കുകയായിരുന്നു അദ്ദേഹം.

കൊവിഡിന്റെ പശ്ചാത്തലത്തിൽ പൊതുജനങ്ങൾക്ക് ആദ്യഘട്ടത്തിൽ 500 കോടിരൂപയുടെ സൗജന്യം നൽകിയ വൈദ്യുതി വകുപ്പ് സിനിമാമേഖലയിലെ പ്രതിസന്ധി മറികടക്കാൻ 5 കോടി രൂപയാണ് ഇളവ് നൽകിയത്.

മെട്രോ യൂത്ത് ഐക്കൻ അവാർഡ് മന്ത്രിയിൽ നിന്ന് വട്ടിയൂർക്കാവ് എം.എൽ.എ വി.കെ. പ്രശാന്ത് ഏറ്റുവാങ്ങി.

ടി.സി.സി.ഐ പ്രസിഡന്റ് എസ്.എൻ. രഘുചന്ദ്രൻ നായർ അദ്ധ്യക്ഷത വഹിച്ചു. മന്ത്രിമാരായ കെ. രാജു, കടന്നപ്പള്ളി രാമചന്ദ്രൻ, വി.കെ. പ്രശാന്ത് എം.എൽ.എ, കെ.ടി.ഡി.സി ചെയർമാൻ എം. വിജയകുമാർ, എസ്.ബി.ഐ ചീഫ് ജനറൽ മാനേജർ മൃഗേന്ദ്രലാൽ ദാസ്, മെട്രോ ഗ്രൂപ്പ് എം.ഡി സിജി നായർ തുടങ്ങിയവർ പങ്കെടുത്തു.

മെട്രോമാർട്ടിന്റെ ആഭിമുഖ്യത്തിൽ തിരുവനന്തപുരം ചേമ്പർ ഒഫ് കൊമേഴ്സ് ആൻഡ് ഇൻഡസ്ട്രീസ്, കേരള ബ്യൂറോ ഫോർ ഇൻഡസ്ട്രിയിൽ പ്രൊമോഷൻ, നാഷണൽ സ്മാൾ ഇൻഡസട്രീസ് കോർപ്പറേഷൻ എന്നിവയുടെ സഹകരണത്തോടെയാണ് എം.എസ്.എം.ഇ സെമിനാറും, അവാർഡുകളും വിതരണം ചെയ്തത്.