ശാസ്താം കോട്ട: പള്ളിക്കലാറ്റിൽ കക്കൂസ് മാലിന്യം ഒഴുക്കുന്നതിനിടെ മൂന്നു പേരെ ശൂരനാട് പൊലീസ് അറസ്റ്റ് ചെയ്തു. നൂറനാട് പാലമേൽ പണയിൽ പാലയുടെ വടക്കതിൽ സന്തോഷ് കുമാർ (38), നൂറനാട് എരുമക്കുഴി ആദി ഭവനത്തിൽ ബിനു (39), നൂറനാട് പണയിൽ തയ്യിൽ വീട്ടിൽ അജീഷ് (25) എന്നിവരെയാണ് കഴിഞ്ഞ ദിവസം പുലർച്ചെ മൂന്നു മണിക്ക് തൊടിയൂർ പാലത്തിന് സമീപത്ത് നിന്ന് പിടികൂടിയത്. കഴിഞ്ഞ രണ്ടാഴ്ചയ്ക്കിടെ നാല് പ്രാവശ്യം ഇവർ പള്ളിക്കലാറ്റിൽ മാലിന്യം ഒഴുക്കിയിരുന്നു. തുടർന്ന് പൊലീസ് ഈ ഭാഗത്ത് പട്രോളിംഗ് ശക്തമാക്കി. രക്ഷപ്പെടാൻ ശ്രമിച്ച പ്രതികളെ പൊലീസ് പിന്തുടർന്ന് പിടികൂടുകയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ശൂരനാട് സി.ഐ ഫിറോസ്, എസ്.ഐമാരായ ശ്രീജിത്ത്, ചന്ദ്രമോൻ, അനുലാൽ, എ.എസ്.ഐമാരായ ഗോപകുമാർ, പ്രദീപ്, ഹരി എന്നിവരുടെ നേതൃത്വത്തിലാണ് പ്രതികളെ പിടികൂടിയത്.