തിരുവനന്തപുരം : ബീമാപള്ളി ദർഗാഷെരീഫിൽ ഉറൂസ് മുബാറക്ക് നാളെ ആരംഭിക്കും. 25 വരെയാണ് ഉറൂസ്. നാളെ രാവിലെ 8ന് ദു ആ പ്രാർത്ഥനയോടെ ദർഗാഷെരീഫ് അങ്കണത്തിൽ നിന്ന് പട്ടണ പ്രദക്ഷിണം ആരംഭിച്ച് 10.30ന് തിരികെ എത്തിച്ചേരും.

രാവിലെ 11ന് ബീമാപള്ളി മുസ്ലിം ജമാഅത്ത് പ്രസിഡന്റ് ജനാബ് എ. മാഹിൻ മിനാരങ്ങളുടെ ശീർഷങ്ങളിലേക്ക് ഇരുവർണ പതാക ഉയർത്തുന്നതോടെ ഉറൂസിന് തുടക്കമാവും. ഉറൂസ് ദിവസങ്ങളിൽ മുനാജാത്ത്, മൗലൂദ് പാരായണം, റാത്തിബ് തുടങ്ങിയ പരിപാടികൾ ഉണ്ടായിരിക്കും. 24വരെ എല്ലാ ദിവസവും രാത്രി ഒമ്പതിന് പ്രഗത്ഭ മതപണ്ഡിതൻമാരുടെ മത പ്രഭാഷണം ഉണ്ടാവും. 25ന് രാവിലെ 2ന് പട്ടണ പ്രദക്ഷിണവും തുടർന്ന് ഐശ്വര്യത്തിനും സമാധാനത്തിനും മതസൗഹാർദ്ദത്തിനും മാനവരാശിയുടെ ക്ഷേമത്തിന് വേണ്ടി പ്രാർത്ഥനയും നടത്തും. വിപുലമായി അന്നദാനം വിതരണം ചെയ്യുന്നതോടെ മഹാമഹം രാവിലെ 5ന് സമാപിക്കും. 25ന് കൊവിഡ് മാനദണ്ഡങ്ങൾ പാലിച്ച് 200 പേരെ പങ്കെടുപ്പിച്ച് ഉറൂസ് ഘോഷയാത്രയും നടക്കും.