തിരുവനന്തപുരം: സംസ്ഥാന പൊലീസ് മേധാവിയുടെ ഓൺലൈൻ പരാതിപരിഹാര പരിപാടി 28, ഫെബ്രുവരി 4, 11, 18, 25 തീയതികളിൽ നടക്കും. തിരുവനന്തപുരം സിറ്റി, റൂറൽ എന്നിവിടങ്ങളിലെ പൊലീസ് ഉദ്യോഗസ്ഥരുടെ പരാതികളാണ് 28ന് പരിഗണിക്കുന്നത്. പരാതികൾ 23ന് മുമ്പ് ലഭിക്കണം. കെ.എ.പി 2,3,5 എന്നിവിടങ്ങളിലെ പരാതികൾ ഫെബ്രുവരി നാലിന് പരിഗണിക്കും. പരാതികൾ ലഭിക്കേണ്ട അവസാന തീയതി ഫെബ്രുവരി ഒന്നാണ്. പാലക്കാട്, പത്തനംതിട്ട ജില്ലകളിലെ പരാതികൾ ഫെബ്രുവരി 11നും മലപ്പുറം, കോട്ടയം ജില്ലകളിലെ പരാതികൾ ഫെബ്രുവരി 18നും പരിഗണിക്കുക. അപേക്ഷ സ്വീകരിക്കുന്ന അവസാന തീയതി യഥാക്രമം ഫെബ്രുവരി എട്ടും 12 ഉം ആണ്. തൃശൂർ സിറ്റി, തൃശൂർ റൂറൽ എന്നിവിടങ്ങളിലെ പരാതികൾ ഫെബ്രുവരി 25 ന് പരിഗണിക്കും. അവസാന തീയതി ഫെബ്രുവരി 20. പരാതികൾ spctalks.pol@kerala.gov.in എന്ന വിലാസത്തിൽ ലഭിക്കണം. പരാതിയിൽ മൊബൈൽ നമ്പർ ഉൾപ്പെടുത്തേണ്ടതാണ്. ഹെൽപ്പ് ലൈൻ നമ്പർ: 9497900243.

സർവീസിൽ ഉള്ളതും വിരമിച്ചതുമായ പൊലീസ് ഉദ്യോഗസ്ഥരുടെ സർവീസ് സംബന്ധവും വ്യക്തിപരവുമായ പരാതികളാണ് പരിഗണിക്കുന്നത്. ഇവ നേരിട്ട് സംസ്ഥാന പൊലീസ് മേധാവിയുടെ ശ്രദ്ധയിൽപ്പെടുത്താം. പൊലീസ് ഉദ്യോഗസ്ഥരുടെ ജീവിതപങ്കാളിക്കും പരാതി നൽകാം.