തൃശൂർ: ഉത്തേജനത്തിനത്തിനുള്ള വ്യാജ മരുന്നുകൾ നിർമ്മിച്ച് ആയുർവേദ നിർമ്മാണ സ്ഥാപനത്തിന്റെ പേരിൽ വിൽപ്പന നടത്തുന്നതായി കണ്ടെത്തി. വെസ്റ്റ് ഫോർട്ട് ജംഗ്ഷന് സമീപം പ്രവർത്തിക്കുന്ന സ്റ്റെപ്പ് ക്രിയേഷൻ എന്ന സ്വകാര്യ സ്ഥാപനത്തിൽ നിന്നാണ് മരുന്നുകൾ കണ്ടെത്തിയത്.ലൈസൻസ് ഇല്ലാതെ നിർമ്മിച്ച മരുന്നുകൾ മറ്റൊരു സ്ഥാപനത്തിന്റെ പേരിൽ വിൽപ്പന നടത്തുന്നതായി ലഭിച്ച വിവരങ്ങളുടെ അടിസ്ഥാനത്തിലായിരുന്നു പരിശോധന. ഈ മരുന്നുകൾ അന്യസംസ്ഥാനങ്ങളിൽ നിർമ്മിച്ച് വിതരണം ചെയ്യുന്നതാണെന്നാണ് പ്രാഥമിക അന്വേഷണത്തിൽ തെളിഞ്ഞു. മരുന്നുകളുടെ ഗുണനിലവാര പരിശോധനയ്ക്കായി സാമ്പിളുകൾ ശേഖരിച്ചിട്ടുണ്ട്.പിടിച്ചെടുത്ത രേഖകളും മരുന്നുകളും തൃശൂർ ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റിൽ ഹാജരാക്കി. സീനിയർ ഡ്രഗ്‌സ് ഇൻസ്‌പെക്ടർ ബെന്നി മാത്യു, ഡ്രഗ്‌സ് ഇൻസ്‌പെക്ടർ എം.പി. വിനയൻ, ഡ്രഗ്‌സ് ഇൻസ്‌പെക്ടർ ആയുർവേദ ഡോ. ആദിത്യ പീതാംബര പണിക്കർ എന്നിവരുടെ നേതൃത്വത്തിലായിരുന്നു പരിശോധന.