കിളിമാനൂർ: രോ​ഗബാധിതയായി ചികിത്സയിലുള്ള പെൺകുട്ടിക്ക് സി.പി.എം, ഡി.വൈ.എഫ്.ഐ പ്രവർത്തകർ സംയുക്തമായി ബിരിയാണി ചലഞ്ചിലൂടെ സഹായധനം സ്വരൂപിച്ച് നൽകി. പുല്ലയിൽ ​ഗോകുലത്തിൽ പവനന്റെ മകൾ ദിവ്യക്കാണ് ചികിത്സാ സഹായം നൽകിയത്. സി.പി.എം പുല്ലയിൽ ബ്രാഞ്ച്, ഡി.വൈ.എഫ്.ഐ തോപ്പിൽമുക്ക് യൂണിറ്റ് എന്നിവയുടെ നേതൃത്വത്തിൽ ബിരിയാണി ചലഞ്ചിലൂടെ ഒരുലക്ഷത്തി ഇരുപതിനായിരം രൂപയാണ് സമാഹരിച്ചത്. തുകയുടെ ചെക്ക് സി.പി.എം ജില്ലാ സെക്രട്ടേറിയറ്റം​ഗം ബി.പി. മുരളി പവനന് കൈമാറി. ത്രിതല പഞ്ചായത്തിലേക്ക് തിരഞ്ഞെടുക്കപ്പെട്ട ജനപ്രതിനിധികളെയും ആദരിച്ചു. കെ. ശിവശങ്കരപിള്ള അദ്ധ്യക്ഷനായി. സി.പി.എം ജില്ലാകമ്മറ്റിയം​ഗം മടവൂർ അനിൽ, ഏരിയാ സെക്രട്ടറി എസ്. ജയചന്ദ്രൻ, ടി.എൻ. വിജയൻ, എൻ. സലിൻ, ജെ. ജിനേഷ്, എ.ആർ. നിയാസ്, ഡി. ശ്രീജ, ബി. അനിൽകുമാർ, വി. രാജേഷ്, ജി.എസ്. അഖിൽ തുടങ്ങിയവർ സംസാരിച്ചു.