കൊച്ചി: രാജ്യത്തെ മികച്ച ശബ്ദാഭിനേതാവിനുള്ള ഷുഗർമീഡിയ വോയിസ് ഫെസ്റ്റ് പുരസ്കാരം പറവൂർ ഏഴിക്കര സ്വദേശി സി.എം അരുണിന്. തിരുവനന്തപുരത്ത് നടന്ന ചടങ്ങിൽ മുഖ്യമന്ത്രി പിണറായി വിജയൻ പുരസ്കാരം സമ്മാനിച്ചു. ബെസ്റ്റ് ഇന്ത്യൻ വോയിസ് ഇൻ മലയാളം കൊമേഴ്ഷ്യൽ എന്ന വിഭാഗത്തിലാണ് അരുണിന് അവാർഡ് ലഭിച്ചത്. 2018 മുതൽ നൽകിവരുന്ന വോയിസ് ഫെസ്റ്റ് അവാർഡിൽ ഒരു മലയാളിക്ക് പുരസ്കാരം ലഭിക്കുന്നത് ആദ്യമായാണ്. ബാഹുബലി ഒന്നും രണ്ടും സിരീസുകളിലും കെ.ജി.എഫിലും പ്രധാന കഥാപാത്രങ്ങൾക്ക് ശബ്ദം നൽകിയത് അരുണാണ്. തമിഴ്, തെലുങ്ക് ഡബ്ബിംഗ് സിനിമകൾ ഉൾപ്പടെ മുന്നൂറോളം സിനിമകൾക്കും രണ്ടായിരത്തിലേറെ പരസ്യങ്ങൾക്കും ശബ്ദം നൽകിയിട്ടുണ്ട്. കാലടി ശ്രീ ശങ്കരാചാര്യ സംസ്‌കൃത സർവകലാശാലയിൽ നിന്ന് തീയറ്ററിൽ ബിരുദാനന്തര ബിരുദം നേടിയ അരുൺ എം.ജി യൂണിവേഴ്‌സിറ്റിൽ നിന്ന് എം.ഫിലും നേടി.