തിരുവനന്തപുരം: റിപ്പബ്ലിക് ദിനാഘോഷത്തിന്റെ ഭാഗമായി സെൻട്രൽ സ്റ്റേഡിയത്തിൽ നടക്കുന്ന പരേഡിനോടനുബന്ധിച്ച് വിപുലമായ സുരക്ഷാക്രമീകരണങ്ങൾ ഏർപ്പെടുത്തിയതായി സിറ്റി പൊലീസ് കമ്മിഷണർ ബൽറാംകുമാർ ഉപാദ്ധ്യായ അറിയിച്ചു. നാല് സോണുകളായി തിരിച്ചാണ് സുരക്ഷയൊരുക്കുന്നത്. ഓരോ സോണിന്റെയും മേൽനോട്ടച്ചുമതല അസി.കമ്മിഷണർമാർക്കായിരിക്കും. ഒാരോ സോണിലും രണ്ട് സെക്ടറുകൾ ഉണ്ടാകും. സെക്ടറുകളിൽ ഇൻസ്‌പെക്ടർമാരുടെ നേതൃത്വത്തിൽ സ്റ്റേഡിയത്തിനകത്തും പുറത്തുമായി 200 പൊലീസുകാരെ വിന്യസിക്കും. നഗരത്തിലെ പ്രധാന സ്ഥലങ്ങൾ കേന്ദ്രീകരിച്ച് ഏഴ് സ്‌പെഷ്യൽ സ്‌ട്രൈക്കിംഗ് ഫോഴ്സുകളും ഏർപ്പെടുത്തിയിട്ടുണ്ട്. ക്ഷണിക്കപ്പെട്ട 100 അതിഥികൾ അല്ലാതെ പൊതുജനങ്ങൾക്ക് സ്റ്റേഡിയത്തിൽ പ്രവേശനമുണ്ടാകില്ല. ഡെപ്യൂട്ടി കമ്മിഷണർ ഡോ.ദിവ്യ വി. ഗോപിനാഥിനായിരിക്കും റിപ്പബ്ലിക് ദിന സുരക്ഷാ ക്രമീകരണങ്ങളുടെ പൂർണ ചുമതലയെന്നും കമ്മിഷണർ അറിയിച്ചു.