തിരുവനന്തപുരം: ജൂൺ 1 മുതൽ കൈറ്റ് വിക്ടേഴ്‌സ് ചാനലിലൂടെ ജൂൺ ഒന്നിന് ആരംഭിച്ച ഫസ്റ്റ്‌ബെൽ ഡിജിറ്റൽ ക്ലാസുകളിൽ പ്ലസ് ടു ക്ലാസുകളുടെ സംപ്രേഷണം ശനിയാഴ്ച പൂർത്തിയാകും. പൊതുപരീക്ഷ ലക്ഷ്യമാക്കി പത്ത്, പ്ലസ് ടു റിവിഷൻ ക്ലാസുകൾ ഞായറാഴ്ച മുതൽ തുടങ്ങുമെന്ന് കൈറ്റ് സി.ഇ.ഒ കെ. അൻവർ സാദത്ത് അറിയിച്ചു. തിങ്കളാഴ്ച മുതൽ രാവിലെ ഓരോ ക്ലാസുകളായാണ് സംപ്രേഷണം.

ക്ലാസുകൾ എപ്പിസോഡുകൾ തിരിച്ച് firstbell.kite.kerala.gov.in പോർട്ടലിൽ ലഭ്യമാണ്. ഇതിന് പുറമെ പ്ലസ് ടു പൊതുപരീക്ഷയ്ക്കുള്ള ഫോക്കസ് ഏരിയ ഉൾപ്പെടുന്ന എപ്പിസോഡുകളും ഓരോ എപ്പിസോഡിലേയും ഫോക്കസ് ഏരിയയുടെ സമയദൈർഘ്യവും പോർട്ടലിൽ ലഭ്യമാക്കും.
തിങ്കളാഴ്ച മുതൽ മൊത്തം ക്ലാസുകളുടെ സമയക്രമത്തിലും മാറ്റമുണ്ട്. അങ്കണവാടി കുട്ടികൾക്കുള്ള കിളിക്കൊഞ്ചൽ ഇനി തിങ്കൾ മുതൽ വെള്ളി വരെ രാവിലെ 11നായിരിക്കും. പ്ലസ് വൺ കുട്ടികൾക്ക് ഈ ദിവസങ്ങളിൽ ഏഴ് ക്ലാസുകളുണ്ടായിരിക്കും. ശനി, ഞായർ ദിവസങ്ങളിൽ ഇനി പ്ലസ് വൺകാർക്ക് കൂടുതൽ ക്ലാസുകൾ സംപ്രേഷണം ചെയ്യും. പത്താം ക്ലാസിന്റെ സംപ്രേഷണം ജനുവരി 17ന് പൂർത്തിയാക്കിയിരുന്നു.