എഴുകോൺ: ലോട്ടറി ടിക്കറ്റ് നമ്പർ തിരുത്തി സമ്മാനം തട്ടിയെടുത്ത മദ്ധ്യവയസ്കനെ എഴുകോൺ പൊലീസ് അറസ്റ്റ് ചെയ്തു. കൊല്ലം കരിക്കോട് റോസ് ന​ഗർ 39 ബിയിൽ വാടകയ്ക്ക് താമസിക്കുന്ന പുനലൂർ കരവാളൂർ വെഞ്ചേമ്പ് ബ്ലാത്തൂർ ഹൗസിൽ ഷാജ് അമീറാണ് (51) അറസ്റ്റിലായത്.

14നായിരുന്നു കേസിനാസ്പദമായ സംഭവം. പുത്തൂർ മാറനാട് കിഴക്ക് എൽ.പി സ്കൂളിന് സമീപം ലോട്ടറി കച്ചവടം നടത്തുന്ന കിഴക്കേ മാറനാട് മലയിൽ ഭാ​ഗം രതീഷ് വിലാസത്തിൽ രതീഷ് കുമാറിന്റെ ലോട്ടറി കടയിലാണ് തട്ടിപ്പ് നടത്തിയത്. സമ്മന തുകയായ 1000 രൂപയിൽ 400 രൂപയുടെ ടിക്കറ്റും ബാക്കി 600 രൂപയും വാങ്ങുകയായിരുന്നു. രതീഷ് കമ്മിഷൻ വാങ്ങാൻ ലോട്ടറി ഓഫീസിൽ എത്തിയപ്പോഴാണ് തട്ടിപ്പ് മനസിലായത്. അവസാന അക്കമായ 8 തിരുത്തി മൂന്നാക്കിയായിരുന്നു തട്ടിപ്പ്. തുടർന്ന് സി.സി ടി.വി സഹായത്തോടെ ആളെ തിരിച്ചറിഞ്ഞ പൊലീസ് പ്രതി സ്ഥിരം ലോട്ടറിയെടുക്കുന്ന കൊല്ലം മൂന്നാംകുറ്റിയിലെ ലോട്ടറി കടയിൽ നിന്ന് പ്രതിയെ പിടികൂടുകയായിരുന്നു.