നെയ്യാറ്റിൻകര: തെക്കിന്റെ കൊച്ചുപാദുവ എന്നറിയപ്പെടുന്ന നെയ്യാറ്റിൻകര രൂപതയിലെ തീർത്ഥാടന കേന്ദ്രമായ കമുകിൻകോട് അന്തോണീസ് ദേവാലയ തിരുനാളിന് നാളെ കൊടിയേറും. തീർത്ഥാടനത്തിന് മുന്നോടിയായി ബി.സി.സി യൂണിറ്റുകളിലേക്ക് ജ്വാലാ പ്രയാണം സംഘടിപ്പിച്ചു. ഇടവക വികാരി ഫാ. ജോയി മത്യാസ് പാരിഷ് കൗൺസിൽ സെക്രട്ടറി ആനന്ദകുട്ടന് തിരികൈമാറി ഉദ്ഘാടനം ചെയ്യ്തു. ഇക്കൊല്ലത്തെ തീർത്ഥാടനത്തിത്തോടൊപ്പം രക്തസാക്ഷിയായ വാഴ്ത്തപ്പെട്ട ദേവസഹായം പിള്ളയുടെ തിരുശേഷിപ്പിന്റെ പ്രതിഷ്ഠയും വിശുദ്ധ യൗസേപ്പ് പിതാവിന്റെ വർഷത്തിന്റെ പ്രഖ്യാപനവും ഉണ്ടാവും.

നാളെ രാവിലെ 7.30 ന് നടക്കുന്ന തിരുനാൾ പ്രാരംഭ ദിവ്യബലിക്ക് നെടുമങ്ങാട് റീജിയണൽ കോ ഓർഡിനേറ്റർ മോൺ. റൂഫസ് പയസലീൻ മുഖ്യകാർമ്മികത്വം വഹിക്കും. വൈകിട്ട് 6.30 ന് കൊച്ചുപള്ളിയിൽ നിന്ന് വലിയ പള്ളിയിലേക്ക് വിശുദ്ധ അന്തോണീസിന്റെ തിരുസ്വരൂപവും വഹിച്ച് തിരുസ്വരൂപ പ്രദക്ഷിണം നടക്കും. 7.30ന് ഇടവക വികാരി ഫാ.ജോയ് മത്യാസ് കൊടിയേറ്റ് കർമ്മം നിർവഹിക്കും. തിരുനാൾ ദിനങ്ങളിൽ തിരുവനന്തപുരം, നെയ്യാറ്റിൻകര രൂപതകളിലെ വൈദികർ ചടങ്ങുകൾക്ക് നേതൃത്വം നൽകും.

10ന് വൈകിട്ട് വിശുദ്ധ യൗസേപ്പിതാവിന്റെ വർഷത്തിന്റെ പ്രഖ്യാപനവും യൗസേപ്പ് പിതാവിന്റെ തിരുസ്വരൂപ പ്രതിഷ്ഠയും നടക്കും.12 ന് വൈകിട്ട് 5 ന് നടക്കുന്ന ദിവ്യബലിക്ക് ഡോ.ഗ്ലാാഡിൻ അലക്സ് മുഖ്യകാർമ്മികത്വം വഹിക്കും. തുടർന്ന് പള്ളിക്ക് ചുറ്റും ദിവ്യകാരുണ്യ പ്രദക്ഷിണം.13 ന് വൈകിട്ട് ദിവ്യബലിയെ തുടർന്ന് തിരുസ്വരൂപ പ്രദക്ഷിണം.തിരുനാൾ സമാപന ദിനമായ 14ന് രാവിലെ 9 ന് നെയ്യാറ്റിൻകര ബിഷപ് ഡോ.വിൻസെന്റ് സാമുവൽ മുഖ്യകാർമ്മികത്വം വഹിക്കുന്ന പൊന്തിഫിക്കൽ ദിവ്യബലി.