തിരുവനന്തപുരം:നഗരത്തിലെ വിവിധ സ്ഥാപനങ്ങളിൽ ജോലിക്കും, മറ്റ് ആവശ്യങ്ങൾക്കും എത്തുന്നവർ പല ബസുകൾ ഇറങ്ങി കയറുന്നത് അവസാനിപ്പിക്കുന്നതിനായി തമ്പാനൂർ ബസ് സ്റ്റേഷനിലേക്കെത്തുന്ന ഫാസ്റ്റ് പാസഞ്ചർ സർവീസ് ബസുകൾ ഇന്നു മുതൽ പി.എം.ജിയിൽ നിന്നും മൂന്ന് വഴികളിലായി തിരിച്ചുവിട്ട് സർവീസ് നടത്തുമെന്ന് കെ.എസ്.ആർ.ടി.സി മേധാവി ബിജു പ്രഭാകർ അറിയിച്ചു.

പി.എം.ജിയിൽ നിന്നും പതിവ് പോലെ ബേക്കറി- പനവിള വഴിയുള്ള സർവീസിനോടൊപ്പം,പി.എം.ജി- മ്യൂസിയം- മാനവീയം വീഥി- ഡി.ജി.പി ഓഫീസ്- വഴുതക്കാട്- വിമെൻസ്കോളേജ് - പനവിള വഴിയും, പി.എം.ജിയിൽ നിന്നും- സെക്രട്ടേറിയറ്റിന് മുന്നിലൂടെയും തമ്പാനൂരിൽ എത്തിച്ചേരുന്ന കണക്കിനുമാണ് സർവീസ് പരീക്ഷണാടിസ്ഥാനത്തിൽ നടത്തുക. കൊല്ലത്തു നിന്ന് എൻ.എച്ച് വഴിയും, കൊട്ടാരക്കരയിൽ നിന്ന് എം.സി റോഡ് വഴിയും ഉള്ള മുഴുവൻ ബസുകളിലും ഈ രീതിയിൽ സർവീസ് നടത്തുന്നതിനുള്ള നിർദ്ദേശം നൽകി.ഈ ബസുകളിൽ ഈ സ്ഥലങ്ങൾ (പിഎംജി- പാളയം - ബേക്കറി വഴി, പിഎംജി - മ്യൂസിയം- മാനവീയംവീഥി- വഴുതക്കാട് വഴി, പി.എം.ജി- പാളയം- സെക്രട്ടറിയേറ്റ് വഴി) വഴിയെന്ന് സ്ഥലനാമ ബോർഡിൽ എഴുതിയിരിക്കും.