ആലപ്പുഴ: സാന്ത്വന സ്പർശം അദാലത്തിന്റെ വേദിയായ ലജ്‌നത്തുൽ മുഹമ്മദീയ സ്‌കൂളിന്റെ മുന്നിലൂടെ പോകുമ്പോഴാണ് മന്ത്രിമാർ പങ്കെടുക്കുന്ന അദാലത്തിനെപ്പറ്റി ഖദീജ അറിഞ്ഞത്. കഴിയുമെങ്കിൽ മന്ത്രിമാരുടെ കൂടെ ഒരു ഫോട്ടോ എടുക്കണമെന്ന ആഗ്രഹവുമായി അദാലത്ത് വേദിയിൽ എത്തിയ ഭിന്നശേഷിക്കാരിയായ ഖദീജ മടങ്ങിയത് സ്വന്തമായൊരു വീടെന്ന സ്വപനം യാഥാർത്ഥ്യമാകുമെന്ന ഉറപ്പോടെയാണ്.
ആലപ്പുഴ സക്കറിയ ബസാർ സ്വദേശിയാ ഖദീജ ബന്ധുക്കളുടെ സഹായത്തോടെയാണ് ജീവിക്കുന്നത്. ഇസ്മയിൽ എന്ന വ്യക്തി പുന്നപ്ര സഹകരണ ആശുപത്രിക്ക് സമീപം ഇഷ്ടദാനമായി നൽകിയ മൂന്ന് സെന്റിൽ സ്വന്തമായൊരു വീട് എന്നതാണ് ഖദീജയുടെ ഏറ്റവും വലിയ സ്വപ്നം. സാന്ത്വന സ്പർശം വേദിയിലെത്തിയെപ്പോഴാണ് ഈ സ്വപ്നത്തിന്റെ സാക്ഷാത്കാരത്തിന് മന്ത്രി ജി.സുധാകരൻ പ്രതീക്ഷ പകർന്നത്. നിരാലംബയായ ഖദീജയ്ക്ക് വീട് നിർമ്മിച്ചു നൽകുമെന്ന് മന്ത്രി അദാലത്ത് വേദിയിൽ വച്ച് ഉറപ്പ് നൽകി. മന്ത്രിമാർക്കൊപ്പം നിന്ന് ഫോട്ടോ എടുത്ത ശേഷമാണ് ഖദീജ മടങ്ങിയത്.