ഹരിപ്പാട്: യുവാവിനൊപ്പം വയോധികൻ സഞ്ചരിച്ച ബൈക്കിനു പിന്നിൽ ആഡംബര ബൈക്ക് ഇടിപ്പിച്ച് ട്രോൾ വീഡിയോ ഉണ്ടാക്കിയ യുവാക്കൾ പിടിയിൽ. ഇൻ ഹരിഹർ നഗർ സിനിമയിലെ തമാശ സീനിലുള്ള ഡയലോഗുകൾ ഉൾപ്പെടെ ചേർത്ത് തയ്യാറാക്കിയ വീഡിയോ വൈറലായിരുന്നു. ഇത് ഔദ്യോഗിക പേജിൽ ഷെയർ ചെയ്ത പൊലീസ്, പൊതുജനങ്ങൾക്ക് അപകട രഹിത വാഹനമോടിക്കൽ സംബന്ധിച്ച് ഉപദേശം നൽകിയതോടെയാണ് യഥാർത്ഥ കഥ പുറത്തുവരുന്നത്.

നങ്ങ്യാർകുളങ്ങര സ്വദേശികളായ യുവാക്കളെയാണ് ആലപ്പുഴ എൻഫോഴ്സ്മെന്റ് വിഭാഗം പിടികൂടിയത്. തൃക്കുന്നപ്പുഴ തോട്ടുകടവ് പാലത്തിന് സമീപത്തായിരുന്നു സംഭവം. വയോധികൻ സഞ്ചരിച്ച ബൈക്കിന് പിന്നിൽ അമിത വേഗത്തിൽ വന്ന ആഡംബര ബൈക്ക് ഇടി

ക്കുകയും ഇടിയേറ്റ ബൈക്ക് മുന്നോട്ടു നീങ്ങുന്നതുമായിരുന്നു വീഡിയോയിൽ. വയോധികന്റെ കൈയ്ക്ക് ചെറിയ പരിക്കേറ്റിരുന്നു. ബൈക്ക് ഓടിച്ച യുവാവ് ക്ഷമ പറഞ്ഞു. അബദ്ധത്തിൽ സംഭവിച്ചതാണെന്ന് കരുതി പരാതിപ്പെടാതെ ഇദ്ദേഹവും ഒപ്പമുണ്ടായിരുന്നയാളും കടന്നുപോയി. ഇതിനു ശേഷമാണ് വീഡിയോയിൽ സിനിമയിലെ തമാശ ഡയലോഗുകൾ ചേർന്ന് പ്രചരിപ്പിച്ചത്.

വീഡിയോ കണ്ട ചിലരാണ് ഇത് മനപൂർവ്വം ട്രോൾ ഉണ്ടാക്കാനായി സൃഷ്ടിച്ച അപടകമാണെന്ന് പൊലീസിനെയും മോട്ടോർ വാഹന വകുപ്പിനെയും അറിയിച്ചത്. ആലപ്പുഴ എൻഫോഴ്സ്മെന്റ് വെഹിക്കിൾ ഇൻസ്പെക്ടർ ഡി.എസ്. സജിത്ത്, എ.എം.വി.ഐമാരായ കെ.ശ്രീകുമാർ, വി.വിനീത്, മുഹമ്മദ് അനസ് എന്നിവരുടെ നേതൃത്വത്തിലുള്ള സംഘമാണ് വാഹന നമ്പർ കേന്ദ്രീകരിച്ചുള്ള അന്വേഷണത്തിൽ നങ്ങ്യാർകുളങ്ങര സ്വദേശികളായ ആറ് യുവാക്കളെ കണ്ടെത്തിയത്. ഒരാൾക്ക് പ്രായപൂർത്തിയായിട്ടില്ല.