ആലപ്പുഴ: ലൈഫ് മിഷൻ പാർപ്പിട സുരക്ഷാ പദ്ധതിയിലൂടെ ജില്ലയിൽ 17620 വീടുകളുടെ നിർമ്മാണം പൂർത്തീകരിച്ചതായി അധികൃതർ അറിയിച്ചു. മൂന്ന് ഘട്ടങ്ങളിലായി മൂന്ന് വർഷം കൊണ്ടാണ് ഇത്രയും വീടുകൾ നിർമ്മിച്ചത്. ഒന്നാം ഘട്ടത്തിൽ 2728, രണ്ടാം ഘട്ടത്തിൽ 8922, രണ്ടാം ഘട്ട ലൈഫ് ഫേസ് (പി.എം.എ.വൈ-ഗ്രാമം) 730, രണ്ടാം ലൈഫ് ഫേസ് (പി.എം.എ.വൈ-നഗരം) 3813, ലൈഫ് ഫേസ് രണ്ടിൽ (പട്ടികജാതി വകുപ്പ്) 793, ലൈഫ് ഫേസ് രണ്ടിൽ (പട്ടികവർഗ വകുപ്പ്) 10, ലൈഫ് ഫേസ് രണ്ടിൽ (ഫിഷറീസ് വകുപ്പ്) 548, മൂന്നാം ഘട്ടത്തിൽ 76 എന്നിങ്ങനെയാണ് വീടുകൾ നിർമ്മിച്ചത്. പറവൂർ, മണ്ണഞ്ചേരി, പള്ളിപ്പാട് എന്നീ സ്ഥലങ്ങളിൽ ഭവനസമുച്ചയങ്ങളുടെ നിർമ്മാണവും പുരോഗമിക്കുന്നു 100ലധികം വീടുകൾ പൂർത്തീകരിച്ച 30 തദ്ദേശ സ്ഥാപനങ്ങളും, 50ലധികം വീടുകൾ പൂർത്തീകരിച്ച 19 തദ്ദേശസ്ഥാപനങ്ങളുമാണ് ജില്ലയിലുള്ളത്. 50ൽ താഴെ വീടുകൾ പൂർത്തീകരിച്ച നാല് പഞ്ചായത്തുകളുണ്ട്.

വീടുകൾ നിർമ്മിച്ചത്

ആലപ്പുഴ നഗരസഭ : 2000

കായംകുളം, ചേത്തല നഗരസഭ : 500ലധികം

മണ്ണഞ്ചേരി, പട്ടണക്കാട്, ചേന്നംപള്ളിപ്പുറം, മാരാരിക്കുളം തെക്ക്, ചേർത്തല തെക്ക്, കഞ്ഞിക്കുഴി, തണ്ണീർമുക്കം, ആര്യാട്, തൃക്കുന്നപ്പുഴ, പാണാവള്ളി - 300ലധികം

കുമാരപുരം, മാരാരിക്കുളം വടക്ക്, വയലാർ, മുഹമ്മ, പുറക്കാട്, അരൂർ, തുറവൂർ, പാലമേൽ, മുതുകുളം, തൈക്കാട്ടുശ്ശേരി, കോടംതുരുത്ത്, കടക്കരപ്പള്ളി - 200ലധികം

രേഖകളുടെ അഭാവത്താൽ കരാർ വെയ്ക്കാൻ കഴിയാതിരുന്നവർക്ക് രേഖകൾ ഹാജരാക്കിയാൽ ഇപ്പോൾ തന്നെ കരാർവെച്ച് ധനസഹായം ലഭ്യമാക്കും. മൂന്നാംഘട്ട ഭൂരഹിത ഭവനരഹിതരുടെ ലിസ്റ്റിൽ നിന്നും ഭൂമി കണ്ടെത്തിയവർക്ക് ഈ വർഷം ഭൂമിയും വീടും ലഭ്യമാക്കും. ലിസ്റ്റുകളിലൊന്നും ഉൾപ്പെടാതിരുന്നവരുടെ അപേക്ഷകൾ അർഹതാ പരിശോധന നടത്തി ലിസ്റ്റ് തയ്യാറാക്കാനുള്ള നടപടികൾ ഉടൻ ആരംഭിക്കും. അടുത്ത ഘട്ടത്തിൽ ഇവർക്കും വീടുകൾ ഉറപ്പാക്കും

- ലൈഫ് മിഷൻ അധികൃതർ