കായംകുളം: കരീലക്കുളങ്ങരയിൽ തെരുവുനായയുടെ ആക്രമണത്തിൽ മൂന്ന് പേർക്ക് കടിയേറ്റു. കരീലക്കുളങ്ങര കമല ഭവനത്തിൽ കമലമ്മ (65), അനന്തു ഭവനത്തിൽ അഭിനവ് (12), അജി ഭവനത്തിൽ അജിൽ (7) എന്നിവർക്കാണ് പരിക്കേറ്റത്. ഞായറാഴ്ച വൈകിട്ട് 3.30 ഒാടെയായിരുന്നു സംഭവം. കുട്ടികൾക്ക് നേരെ പാഞ്ഞെത്തിയ നായ ഇരുവരെയും കടിച്ച ശേഷമാണ് സമീപത്തുള്ള കമലമ്മയുടെ വീട്ടിലെത്തിയത്. വീടിന് മുന്നിലെ കൂട്ടിൽ കിടന്നിരുന്ന പട്ടിക്കുട്ടിയെ ആക്രമിക്കാൻ ശ്രമിച്ചത് തടയാൻ ശ്രമിച്ചപ്പോഴാണ് കമലമ്മയ്ക്ക് കടിയേറ്റത്. സാരമായി പരിക്കേറ്റ മൂവരെയും ആലപ്പുഴ മെഡി. ആശുപത്രിയിൽ പ്രവേശിപ്പിച്ചു.