വള്ളികുന്നം: ഏഴാമത് പ്രതിഭാമരപ്പട്ടം അവാർഡ് വള്ളികുന്നം സ്വദേശിനി ചിപ്പിമോൾക്ക്

ജില്ലാ പഞ്ചായത്ത്‌ പ്രസിഡന്റ് കെ ജി രാജേശ്വരി സമ്മാനി​ച്ചു. സമൂഹത്തിലെ വിവിധ മേഖലകളിൽ പ്രതിഭകളായിട്ടുള്ള കുട്ടികൾക്ക് സംസ്ഥാന അദ്ധ്യാപക,വനമിത്ര അവാർഡ് ജേതാവ് എൽ. സുഗതൻ നൽകി വരുന്ന അവാർഡാണിത്.

ചിപ്പിയുടെ വീട്ടിൽ നടന്ന ചടങ്ങിൽ വള്ളികുന്നം ഗ്രാമ പഞ്ചായത്ത്‌ പ്രസിഡന്റ് വിജി പ്രസാദ് അദ്ധ്യക്ഷത വഹിച്ചു. യോഗത്തിൽ പത്തനാപുരം ഗാന്ധിഭവൻ ഡയറക്ടർ ഡോ. പുനലൂർ സോമരാജൻ മുഖ്യപ്രഭാഷണം നടത്തി.

എസ്.ഐ. ഇ.ടി​ ഡയറക്ടർ ബി. അബുരാജ് മുഖ്യാതിഥിയായിരുന്നു. ബ്ലോക്കംഗം അഡ്വ. എസ്. രാജേഷ്, വാർഡ് അംഗം റഹിയാനത്ത്, പൊതു പ്രവർത്തകരായ അബ്ബാ മോഹൻ, ഷാജഹാൻ രാജധാനി,രാജീവ്‌ രാജധാനി, പരിസ്ഥിതി പ്രവർത്തകരായ ശൂരനാട് രാധാകൃഷ്ണൻ, വിശ്രുതൻ ആചാരി, സാവിത്രി ടീച്ചർ തുടങ്ങിയവർ സംസാരിച്ചു.

കായംകുളം ബിഷപ്പ് മൂർ സ്കൂളിൽ ഏഴാം ക്ലാസ് വിദ്യാർത്ഥിനിയായ ചിപ്പി നൃത്തമാടുന്നത് നിർദ്ധനരായ കാൻസർ രോഗികൾക്ക് വേണ്ടിയാണ്.പന്ത്രണ്ട് വയസിനിടയിൽ ഇരുന്നൂറോളം വേദികളിൽ നൃത്തമാടി കിട്ടിയ പ്രതിഫലം വേദിയിൽവച്ച് തന്നെ രോഗികൾക്ക് നൽകുകയാണ് പതിവ്. ഓട്ടോ ഡ്രൈവർ ആയ അച്ഛൻ പ്രദീപും ചിത്ര അമ്മയും മണികണ്ഠൻ ഏക സഹോദരനുമാണ്.