മൂവാറ്റുപുഴ: മൂവാറ്റുപുഴ ഗവ.മോഡൽ വൊക്കേഷണൽ ഹയർ സെക്കൻഡറി സ്‌കൂളിലെ വി.എച്ച്.എസ് ഇ വിഭാഗത്തിന് നിർമിച്ച പുതിയ അക്കാഡമിക് ബ്ലോക്കിന്റെ ഉദ്ഘാടനം ഈ മാസം 6 ന് രാവിലെ 10ന് മുഖ്യമന്ത്രി പിണറായി വിജയൻ ഓൺലൈനായി ഉദ്ഘാടനം ചെയ്യുമെന്ന് എൽദോ എബ്രഹാം എം.എൽ.എ അറിയിച്ചു. ചടങ്ങിൽ വിദ്യാഭ്യാസ വകുപ്പ് മന്ത്രി പ്രൊഫ.സി.രവീന്ദ്രനാഥ് അദ്ധ്യക്ഷത വഹിക്കും. ധനകാര്യ വകുപ്പ് മന്ത്രി ഡോ.ടി.എം.തോമസ് ഐസക്ക് മുഖ്യപ്രഭാഷണം നടത്തും. പുതിയ മന്ദിരം നിർമിക്കുന്നതിന് വൊക്കേഷണൽ ഹയർസെക്കൻഡറി വകുപ്പ് പ്ലാൻ ഫണ്ടിൽ നിന്നും 1.36കോടി രൂപയാണ് അനുവദിച്ചത്. നാല് നിലകളിലായി 7500ഓളം സ്‌ക്വയർഫീറ്റ് വരുന്ന മന്ദിരത്തിന്റെ നിർമ്മാണമാണ് പൂർത്തിയാക്കിയത്. നാല് ക്ലാസ് മുറികൾ, ഒരു ഓഫീസ് മുറി, ഒരു സ്റ്റാഫ് റൂം, രണ്ട് ലാബ് റൂമുകൾ, ബാത്ത് റൂമുകൾ, മിനി ഓഡിറ്റോറിയം എന്നിവയാണ് പുതിയ മന്ദിരത്തിൽ സജ്ജീകരിച്ചിരിക്കുന്നത്.വി.എച്ച്.എസ്.എസിന്റെ മൂന്ന് കോഴ്‌സുകളാണ് ഇവിടെയുള്ളത്. അഗ്രികൾച്ചറൽ വിഭാഗത്തിൽ രണ്ടും, ലൈവ് സ്റ്റോക്ക് മനേജ്‌മെന്റിലെ ഒരു കോഴ്‌സുമാണുള്ളത്. ഫസ്റ്റ് ഇയറിലേയും, സെക്കൻഡ് ഇയറിലേയുമായി 148വിദ്യാർത്ഥികളാണ് ഇവിടെ പഠിക്കുന്നത്. പ്രിൻസിപ്പൽ അടക്കം 11 അദ്ധ്യാപകരും, നാല് ഓഫീസ് സ്റ്റാഫുകൾ അടക്കമുള്ള ജീവനക്കാരാണ് ഇവിടെ യുള്ളത്. വി.എച്ച്.എസ്.എസിക്ക് മൂന്ന് കെട്ടിടങ്ങളാണ് ഉണ്ടായിരുന്നത്. ഇതിൽ ഒരു കെട്ടിടം അപകടാവസ്ഥയിലായതിനെ തുടർന്ന് വിദ്യാഭ്യാസ വകുപ്പ് പൊളിച്ച് മാറ്റിയിരുന്നു. ഈ പൊളിച്ച് മാറ്റിയ സ്ഥലത്താണ് പുതിയ മന്ദിരം നിർമിച്ചത്.