മൂവാറ്റുപുഴ: മൂവാറ്റുപുഴ നിയോജക മണ്ഡലത്തിൽ ആദ്യഹൈടക് സ്‌കൂളായി സർക്കാർ പ്രഖ്യാപിച്ച പേഴയ്ക്കാപ്പിള്ളി ഗവൺമെന്റ് ഹയർസെക്കൻഡറി സ്‌കൂളിന്റെ ഒന്നാംഘട്ടം നിർമ്മാണം പൂർത്തികരിച്ച മന്ദിരത്തിന്റെ ഉദ്ഘാടനം നാളെ രാവിലെ 10ന് മുഖ്യമന്ത്രി പിണറായി വിജയൻ നിർവഹിക്കുമെന്ന് എൽദോ എബ്രഹാം എം.എൽ.എ അറിയിച്ചു. വിദ്യാഭ്യാസ വകുപ്പ് മന്ത്രി പ്രൊഫ.സി.രവീന്ദ്രനാഥ് അദ്ധ്യക്ഷത വഹിക്കും. ധനകാര്യ വകുപ്പ് മന്ത്രി ഡോ.ടി.എം.തോമസ് ഐസക്ക് മുഖ്യപ്രഭാഷണം നടത്തും. പേഴയ്ക്കാപ്പിള്ളി ഗവൺമെന്റ് ഹയർസെക്കൻഡറി സ്‌കൂളിൽ നിർമ്മാണ പ്രവർത്തനങ്ങൾക്കായി 6.95കോടി രൂപയുടെ പദ്ധതിക്കാണ് കിഫ്ബി അംഗീകാരം ലഭിച്ചത്. അഞ്ച് കോടി രൂപ സംസ്ഥാനസർക്കാരും 1.95കോടിരൂപ എം.എൽ.എ മണ്ഡലത്തിൽ നടപ്പാക്കുന്ന സമഗ്ര വിദ്യാഭ്യാസ പദ്ധതിയായ വിദ്യാ ദീപ്തി പദ്ധതിയിൽ ഉൾപ്പെടുത്തി വിവിധ നാഷ്ണലേസ്റ്റ് ബാങ്കുകൾ, സഹകരണ സംഘങ്ങൾ, വിവിധ സംഘടനകൾ, വ്യക്തികൾ എന്നിവരിൽ നിന്നും സ്വരൂപിച്ച് നിർമ്മാണ പ്രവർത്തനങ്ങൾ പൂർത്തിയാക്കുന്നതിനാണ് പദ്ധതി വിഭാവനം ചെയ്തിരിക്കുന്നത്. ഒന്നാം ഘട്ടത്തിൽ മൂന്ന് നിലകളിലായി 15000സക്വയർ ഫീറ്റ് വരുന്ന മന്ദിരത്തിന്റെ നിർമ്മാണമാണ് പൂർത്തിയായത്. 13ക്ലാസ് മുറികൾ, നാല് ലാബ് എന്നിവയാണ് പുതിയമന്ദിരത്തിൽ സജ്ജീകരിച്ചിരിക്കുന്നത്. ഇതോടൊപ്പം തന്നെ ഹൈടെക് ബാത്ത് റൂം സജ്ജീകരിക്കുന്നുണ്ട്. രണ്ടാം ഘട്ടത്തിൽ മൂന്ന് നിലകളിലായി പുതിയ മന്ദിരവും ഓഡിറ്റോറിയവുമാണ് നിർമ്മിക്കുന്നത്. വാപ്‌കോസിനാണ് നിർമ്മാണ ചുമതല. ഒന്നാം ഘട്ടം പൂർത്തിയായ മന്ദിരം ഉദ്ഘാടനം ചെയ്യുന്നതോടെ ഇവിടെ ക്ലാസുകൾ ആരംഭിക്കാനാകും.