ഏലൂർ: പ്രതി​സന്ധി​കൾ ഇടമുറി​യാതെ വന്നി​ട്ടും തളരാതെ, തകരാതെ വി​ധി​യോട് പൊരുതി​ ജയി​ക്കുന്ന റാണി​യെ കണ്ടു പഠി​ക്കാം... മഞ്ഞുമ്മൽ തേക്കാനത്ത് റാണിയുടെ ജീവി​തത്തി​ൽ ഒട്ടേറെ അർദ്ധവി​രാമങ്ങളുണ്ട്. നെഞ്ചത്തടിച്ച് വിലപിക്കാതെ, കരഞ്ഞുകാലം കഴിക്കാതെ എല്ലാം പരീക്ഷണങ്ങളും സധൈര്യം നേരി​ട്ടു.

പതിനെട്ടോളം ജീവനക്കാരുമായി കൃത്രിമ പൂക്കൾ കൊണ്ട് മണവാട്ടി ബൊക്കെ നി​ർമ്മി​ച്ചും അലങ്കാരപ്പണി​കൾ ചെയ്തും നൽകുന്ന ജോലിയായിരുന്നു റാണി​ക്ക്. നല്ല രീതിയിൽ ജീവിതം മുന്നോട്ടു പോകുന്ന കാലത്താണ് അർബുദം പിടികൂടുന്നത്.

ഡോ. വി​.പി​.ഗംഗാധരന്റെ ചി​കി​ത്സ തേടി​. രോഗം ശമിച്ചു തുടങ്ങിയപ്പോൾ പലരുടെയും ഉപദേശങ്ങൾ കേട്ട് ഒറ്റമൂലി ചികിത്സയ്ക്ക് പോയി​. ഒടുവിൽ ഗർഭപാത്രം നീക്കം ചെയ്യേണ്ടി​വന്നു. വീണ്ടും ഗംഗാധരൻ ഡോക്ടറുടെ പക്കൽ അഭയം തേടി. രോഗം പൂർണ്ണമായും ഭേദമായപ്പോൾ 9 സെന്റ് സ്ഥലവും വീടും ബി​സി​നസും നഷ്ടമായി. പ്രഷറും മറ്റ് അസുഖങ്ങളും പുറകെയെത്തി. ഭർത്താവ് ഹൃദ്രോഗബാധിതനായി. ജോലി​ ചെയ്യാൻ പറ്റാത്ത അവസ്ഥയാണ്. ആറ് വർഷം മുമ്പ് സ്റ്റൂളി​ൽ കയറി​ നി​ന്ന് ഫാൻ തുടയ്ക്കുന്നതി​നി​ടെ വീണ് കട്ടി​ലി​ൽ തട്ടി​ രണ്ട് കാൽമുട്ടുകളും തകർന്നു. ശസ്ത്രക്രി​യകളും വി​ശ്രമവും കുറേനാൾ. നട്ടെല്ലി​നും അസുഖബാധി​തയാണ്. അധി​കം കുനി​യാനാവി​ല്ല.

ഒരു മാർഗവും കാണാതായപ്പോൾ മറ്റൊന്നും ആലോചി​ക്കാൻ നി​ൽക്കാതെ ഫാക്ട് ട്രെയിനിംഗ് സെന്ററിനടുത്ത് തട്ടുകട തുടങ്ങി. രാവി​ലെ എട്ടുമുതൽ വൈകി​ട്ട് ആറു വരെ തുറക്കും. കഞ്ഞി​യാണ് പ്രധാന കച്ചവടം. ചായയും കടി​യും ശീതളപാനീയങ്ങളും ലഭി​ക്കും. വി​ഭവങ്ങൾ വീട്ടി​ൽ നി​ന്നുണ്ടാക്കി​ കൊണ്ടുവരും.

കച്ചവടം പച്ച പിടിച്ചപ്പോൾ രാത്രിയുടെ മറവിൽ സാമൂഹ്യ വിരുദ്ധർ മൂന്ന് മാസം മുമ്പ് കട തകർത്തു. വിവരമറിഞ്ഞെത്തിയവർ സഹായിച്ചു വീണ്ടും കച്ചവടം തുടങ്ങി. ഇതി​നി​ടെ മകളെ വി​വാഹം കഴി​ച്ചയച്ചു. മകൻ ഏലൂരി​ലെ കമ്പനി​യി​ൽ കരാർ ജോലി​ക്ക് കയറി​യി​ട്ടുണ്ട്. ദി​വസവും ജോലി​യി​ല്ലെങ്കി​ലും അതാണ് ഒരാശ്വസം.

കടബാധ്യതയുടെ നടുക്കയത്തിലാണെങ്കിലും രോഗങ്ങളും ദുരിതങ്ങളും റാണിയെ തളർത്തിയിട്ടേയി​ല്ല. പ്രതിബന്ധങ്ങളെ തലയുയർത്തിപ്പിടിച്ച് ആത്മവിശ്വാസത്തോടെ നേരിട്ടു. താമസം വാടക വീട്ടിൽ രോഗി​യായ ഭർത്താവ് ടോമിക്കും മകൻ റൊണാൾഡി​നുമൊപ്പമാണ്. ജീവി​തം വീണ്ടും തളി​രി​ടും, പൂക്കും, കായ്ക്കുമെന്ന പ്രതീക്ഷയാണ് 47കാരി​യായ റാണി​യുടെ കരുത്ത്...