പറവൂർ: പരമ്പരാഗത തൊഴിൽ മേഖലയെ പ്രോത്സാഹിപ്പിക്കുന്നതിന് വേണ്ടി മുസിരിസ് പൈതൃക പദ്ധതിയുടെ കീഴിൽ പുനർനിർമ്മിച്ചിട്ടുള്ള പാലിയം നടയിൽ സ്ഥിതി ചെയ്യുന്ന ഒമ്പതോളം കടമുറികൾ അപേക്ഷ ക്ഷണിച്ചതിന്റെ അടിസ്ഥാനത്തിൽ വ്യക്തികൾക്ക് നൽകുവാനുള്ള പ്രാരംഭ ആരംഭിച്ചു. പരമ്പരാഗത തൊഴിലുകളായ കൈത്തറി, പപ്പട നിർമ്മാണം, കൊല്ലപ്പണി, ശില്പ നിർമ്മാണം, സ്വർണ്ണപ്പണി, കളിമൺപാത്ര നിർമ്മാണം, തഴപ്പായ നെയ്ത്ത്, മരപ്പണി, മൂശാരിപ്പണി എന്നീ തൊഴിലുകൾക്കാണ് കടമുറികൾ അനുവദിച്ചിട്ടുള്ളത്. കടകൾ നടത്തുന്നവരുമായി മുസിരിസ് പൈതൃക പദ്ധതി മാനേജിംഗ് ഡയറക്ടർ പി.എം. നൗഷാദ് പദ്ധതിയുടെ വിശദമായ അവലോകനം നടത്തി. കടമുറികളുടെ ഉദ്‌ഘാടനം ചെയ്ത് പ്രവർത്തന സജ്ജമാക്കുവാൻ യോഗം തീരുമാനിച്ചു. പാലിയം ട്രസ്റ്റ്‌ മാനേജർ ശ്രീകൃഷ്ണ ബാലൻ, മുസിരിസ് പൈതൃക പദ്ധതി മാർക്കറ്റിംഗ് മാനേജർ ഇബ്രാഹിം സബിൻ, മ്യൂസിയം മാനേജർ കെ.ബി. നിമ്മി എന്നിവർ സംസാരിച്ചു.