അമ്പലമേട്: അത്യാഹിത സാഹചര്യങ്ങളെ നേരിടുന്നതിന് വിവിധ സുരക്ഷാ സംവിധാനങ്ങളെ സജ്ജമാക്കുന്നതിനായി അമ്പലമേട് എച്ച്.ഒ.സി.എല്ലിൽ മോക്ക് ഡ്രിൽ സംഘടിപ്പിച്ചു.ജില്ലാ ദുരന്തനിവാരണ അതോറി​റ്റിയുടെ ആഭിമുഖ്യത്തിലായിരുന്നു പരിപാടി. ജില്ലാതല കൺട്രോൾ റൂമായി കളക്ട്രേറ്റിലെ ജില്ലാ അടിയന്തരഘട്ട കാര്യനിർവഹണ കേന്ദ്രം, പ്രാദേശിക കൺട്രോൾ റൂമായി അമ്പലമേട് പൊലീസ് സ്റ്റേഷൻ എന്നിവയിലൂടെയാണ് പ്രവർത്തനങ്ങൾ ഏകോപിപ്പിച്ചത്. ഇന്നലെ ഉച്ചയ്ക്ക് 12 ന് ആരംഭിച്ച നടപടി ക്രമങ്ങൾ 1.30 ഓടെ പൂർത്തിയായി. ജില്ലാ ദുരന്തനിവാരണ വിഭാഗം ഡെപ്യൂട്ടി കളക്ടർ എസ്. ഷാജഹാൻ, ജില്ലാ ഹസാർഡ് അനലിസ്​റ്റ് അഞ്ജലി പരമേശ്വരൻ, പൊലീസ്, ആരോഗ്യവകുപ്പ്, ദേശീയ ദുരന്ത നിവാരണ സേന, മോട്ടോർ വാഹന വകുപ്പ്, മലിനീകരണ നിയന്ത്റണ ബോർഡ് എന്നീ വിവിധ വകുപ്പുകളിലെ ഉദ്യോഗസ്ഥർ, എച്ച്.ഒ.സി.എൽ സുരക്ഷ വിഭാഗം ഉദ്യോഗസ്ഥർ, വിവിധ ഫാക്ടറികളിലെ ഉദ്യോഗസ്ഥർ എന്നിവർ പങ്കെടുത്തു.