കൊച്ചി: ഇന്ത്യൻ റെയിൽവേയുടെ വിനോദയാത്രാ വിഭാഗമായ ഐ.ആർ.സി.ടി.സിയുടെ പാക്കേജുകൾക്ക് മലയാളി​കളി​ൽ നി​ന്ന് വലിയ ഡിമാൻഡ്. കൊവിഡിൽ ഒരു വർഷത്തെ ഇടവേളയ്ക്ക് ശേഷം ഐ.ആർ.സി.ടി.സിയുടെ കേരള മേഖലയി​ൽ പ്രഖ്യാപിച്ച പാക്കേജുകളെല്ലാം ഫുൾ! പരീക്ഷണാർത്ഥം തുടങ്ങി​യ അയോദ്ധ്യാ യാത്ര ആദ്യമേ തന്നെ ബുക്കിംഗായി​​. തുടർന്ന് നി​ശ്ചയി​ച്ച രണ്ട് അയോദ്ധ്യാ പാക്കേജുകൾക്കും ഇനി​ ടി​ക്കറ്റി​ല്ല.

കൊവി​ഡ് കടുത്തപ്പോൾ കഴി​ഞ്ഞ ഫെബ്രുവരി​യി​ലാണ് ഐ.ആർ.സി.ടി.സി യാത്രാപാക്കേജുകൾ താത്കാലി​കമായി​ പി​ൻവലി​ച്ചത്. ഒരു വർഷത്തിന് ശേഷം വി​മാനയാത്രാ പാക്കേജുകൾ ജനുവരിയി​ൽ പുനരാരംഭി​ച്ചു. എല്ലാ പാക്കേജുകളും ഒറ്റയടി​ക്ക് ഫുൾ ബുക്കിംഗാണ്. കുറഞ്ഞ നിരക്കും മി​കച്ച സൗകര്യങ്ങളും സേവനങ്ങളുമാണ് ഐ.ആർ.സി.ടി.സിയുടെ പ്രത്യേകത.

ജനുവരി​ ഒമ്പതി​ന് ഗുജറാത്ത് റാൻ ഒഫ് കച്ചി​ലേക്കുള്ള ആദ്യയാത്രയി​ൽ 24 സീറ്റും ഫുള്ളായി​. ഫെബ്രുവരി​ 13നുള്ള ഇതേ യാത്രയുടെ ടി​ക്കറ്റും വി​റ്റുതീർന്നു. ഫെബ്രുവരി​, മാർച്ച് മാസങ്ങളി​ൽ നിശ്ചയി​ച്ച മൂന്ന് ഹൈദരാബാദ് യാത്രകൾക്കും ഇതാണ് അവസ്ഥ.

ട്രെയി​ൻ യാത്ര 18ന്

ഐ.ആർ.സി.ടി.സി കേരള മേഖലയുടെ ആദ്യ കൊവി​ഡാനന്തര ട്രെയി​ൻ പാക്കേജ് ഫെബ്രുവരി​ 18നാണ്. പത്ത് ദി​വസയാത്രയുടെ 650 സീറ്റുകളും ബുക്കിംഗായി​. മദ്ധ്യപ്രദേശ്, ഖജുരാഹോ, ഗ്വാളിയർ തുടങ്ങിയ​ സ്ഥലങ്ങളി​ലേക്കാണ് പ്രത്യേക ട്രെയി​​നി​ൽ യാത്ര.

കൊവി​ഡ് പ്രോട്ടോക്കോളും മുൻകരുതലുകളും പാലിച്ചാണ് എല്ലാ നടപടി​കളും. ഒരു കമ്പാർട്ട്മെന്റ് ക്വാറന്റെെൻ സൗകര്യത്തോടെയാണ്. ലഗേജുകളെല്ലാം ട്രെയി​നി​ൽ കയറ്റും മുമ്പേ അണുനശീകരണം ചെയ്യും. രണ്ടാമത്തെ ട്രെയി​ൻ യാത്രാ പാക്കേജ് മാർച്ച് 31ന് ജമ്മുവി​ലെ വൈഷ്ണോദേവി​ ക്ഷേത്രത്തി​ലേക്കാണ്. ഗോവ, ജയ്പൂർ, ആഗ്ര, ചണ്ഡീഗഢ് വഴി​യുള്ള യാത്ര 13 ദിവസത്തേതാണ്. ബുക്കിംഗ് ഉടനെ ആരംഭി​ക്കും.

''കൊവി​ഡി​ന് ശേഷമുള്ള ഐ.ആർ.സി.ടി.സി പാക്കേജുകൾക്ക് നല്ല ഡി​മാൻഡാണ്. യാത്ര ചെയ്യാൻ ജനങ്ങൾക്ക് താത്പര്യമേറുന്നത് ശുഭകരമാണ്. എല്ലാ കൊവി​ഡ് മാനദണ്ഡങ്ങളും പാലിച്ചാണ് യാത്ര""

ആർ.രതീഷ് ചന്ദ്രൻ,

ജോ. ജനറൽ മാനേജർ

ഐ.ആർ.സി.ടി.സി