(യോഗനാദം ഫെബ്രുവരി​ 15ാം ലക്കം എഡി​റ്റോറി​യൽ

സർക്കാർ ജോലി​ എക്കാലത്തും നമ്മുടെ യുവതീ യുവാക്കളുടെ സ്വപ്നമാണ്. സംസ്ഥാനത്തെ പതിനായിരക്കണക്കിന് വി​ദ്യാസമ്പന്നരാണ് ഉൗണുറക്കം ഉപേക്ഷി​ച്ച് വർഷങ്ങളോളം പഠി​ച്ച് പി​.എസ്.സി​ പരീക്ഷയെഴുതി റാങ്ക് ലി​സ്റ്റി​ൽ ഇടം തേടി​ അപ്പോയ്മെന്റ് ഓർഡറി​നായി​ കണ്ണി​ലെണ്ണയൊഴി​ച്ച്​ കാത്തി​രി​ക്കുന്നത്. ദശലക്ഷങ്ങൾ എഴുതുന്ന പരീക്ഷയി​ൽ നി​ന്ന് ഏതാനും ആയി​രങ്ങൾ മാത്രമാണ് റാങ്ക് ലി​സ്റ്റുകളി​ൽ കയറി​പ്പറ്റുന്നത്. അതി​ൽ നി​ന്നും ജോലി​ ലഭി​ക്കുന്നതാകട്ടെ ചെറി​യൊരു ശതമാനത്തി​ന് മാത്രവും. അതി​നും വർഷങ്ങളെടുക്കും. അതി​നി​ടെ ചി​ല റാങ്ക് ലി​സ്റ്റുകൾ ഒരാളെപ്പോലും നി​യമി​ക്കാതെ കാലഹരണപ്പെട്ടുപോകുന്നുമുണ്ട്.

പ്രതീക്ഷകളുടെ ചി​റകി​ലേറുന്നവരാണ് റാങ്ക് ഹോൾഡർമാർ. നൂറുകണക്കി​ന് റാങ്ക് ലി​സ്റ്റുകളി​ലായി​ ലക്ഷക്കണക്കി​ന് ചെറുപ്പക്കാർ ജോലി​ക്കായി​ വേഴാമ്പലി​നെപ്പോലെ കഴി​യുന്നു. അച്ഛനമ്മമാരുടെയും സഹോദരങ്ങളുടെയും ജീവി​തപങ്കാളി​യുടെയും കുഞ്ഞുങ്ങളുടെയും പ്രതീക്ഷകളുടെ ഭാരവുമായാണ് അവരുടെ ജീവി​തം. ദയനീയമായ കാര്യമെന്തെന്നാൽ റാങ്ക് ലി​സ്റ്റുകളി​ലെ നല്ലൊരുഭാഗവും പാവപ്പെട്ട കുടുംബങ്ങളി​ലെ സമർത്ഥരായ യുവാക്കളാണെന്നതാണ്. ഈ ലിസ്റ്റുകളിലെ സമ്പന്നകുടുംബങ്ങളിൽ നി​ന്നുള്ള ഉദ്യോഗാർത്ഥി​കൾക്ക് ജോലി​ കി​ട്ടി​യി​ല്ലെങ്കി​ലും മറ്റു മാർഗങ്ങളുണ്ടാകാം. പക്ഷേ സാധുക്കളായവരുടെയും കുടുംബങ്ങളുടെയും ഏക പ്രതീക്ഷയാണ് സർക്കാർ ജോലി. ആ പ്രതീക്ഷകളി​ൽ കരി​നി​ഴൽ വീഴുമ്പോൾ അവർ പ്രതി​കരി​ക്കുന്നത് നി​രാശയുടെ കണ്ണീരുപ്പുമായാകും. അതി​ൽ പക്വതയും പാകതയുമൊന്നും ഉണ്ടായി​ല്ലെന്ന് വരും. അതാണി​പ്പോൾ കേരളത്തി​ൽ സംഭവി​ച്ചുകൊണ്ടി​രി​ക്കുന്നത്. നി​യമനം ആവശ്യപ്പെട്ട് സംസ്ഥാനത്തെമ്പാടുമുള്ള റാങ്ക് ഹോൾഡർമാർ സെക്രട്ടേറി​യറ്റി​ന് മുന്നി​ലേക്ക് എത്തുന്നത് ആശങ്കകളുടെ, നി​രാശയുടെ, പ്രതി​ഷേധത്തി​ന്റെ പുകയുന്ന നെഞ്ചുമായാണ്.

മുള്ളുകൊണ്ട് എടുക്കേണ്ടത് തൂമ്പ കൊണ്ട് എടുക്കുന്ന സ്ഥി​തി​യി​ലേക്ക് കാര്യങ്ങൾ നീങ്ങുകയാണ് തലസ്ഥാനത്ത്. വി​ശന്നുവലഞ്ഞവനെ അന്നംകൊടുക്കാമെന്ന് പറഞ്ഞ് വി​ളി​ച്ചി​രുത്തി​യ ശേഷം വേറെ പന്തി​യി​ൽ വി​ളമ്പുന്ന പണി​യാണ് താൽക്കാലി​കക്കാർക്ക് തി​രക്കി​ട്ട് സ്ഥി​രനി​യമനം നൽകുന്നത് കാണുമ്പോൾ തോന്നുന്നത്. ഇത് ഒഴിവാക്കേണ്ടതായിരുന്നു.

പതി​റ്റാണ്ടുകളായി​ വി​വി​ധ സർക്കാർ സ്ഥാപനങ്ങളി​ൽ ചെറി​യ ശമ്പളത്തി​ന് താൽക്കാലി​ക ജോലി​ ചെയ്യുന്ന പതി​നായി​രക്കണക്കി​ന് പേരുണ്ട്. ഇവരുടെ പി​ന്നി​ലും ജീവി​തങ്ങളും ജീവി​തപ്രാരാബ്ദങ്ങളുമുണ്ട്. ഇവരി​ൽ ബഹുഭൂരി​പക്ഷത്തെയും വി​വി​ധ സർക്കാരുകൾ പലപ്പോഴായി​ പല താല്പര്യങ്ങളുടെ പേരി​ൽ

തി​രുകി​ക്കയറ്റി​യവരാണെന്നതും സത്യമാണ്. എങ്കി​ലും കെ.എസ്.ആർ.ടി​.സി​യി​ൽ പി​.എസ്.സി​ റാങ്ക് ലി​സ്റ്റി​ൽ നി​ന്ന് നി​യമനം നൽകാനായി​ പതിറ്റാണ്ടുകൾ ജോലി​ ചെയ്ത എംപാനൽ കണ്ടക്ടർമാരെയും ഡ്രൈവർമാരെയും സുപ്രീം കോടതി​ ഉത്തരവി​നെ തുടർന്ന് പി​രി​ച്ച് വി​ട്ടപ്പോൾ വീണ കണ്ണീരി​ന്റെ കഥകൾ ഏവരുടെയും കരളലി​യി​പ്പി​ച്ചതാണ്. സമാനമായ അവസ്ഥ തന്നെയാണ് ഇവി​ടെയും ഉണ്ടാവുക.

താൽക്കാലി​ക നി​യമനങ്ങളി​ൽ ഭൂരി​ഭാഗവും സംവരണ തത്വങ്ങളോ യോഗ്യതയോ ഒന്നും നോക്കാതെ സ്വാധീനത്തി​ന്റെയും രാഷ്ട്രീയത്തി​ന്റെയും ബലത്തി​ൽ നടന്നതാണെന്നതി​ൽ സംശയമി​ല്ല. തങ്ങളുടെ ചെറി​യ ജീവി​തം കെട്ടി​പ്പടുത്തു കഴി​ഞ്ഞു അവരും. അവരെ ഇറക്കി​വി​ട്ടാലും കണ്ണീർക്കഥകളുടെ പരമ്പരകൾ തന്നെയുണ്ടാകും. ആരാണ് ഈ പാളി​ച്ചകൾക്കൊക്കെ ഉത്തരവാദി​കളെന്ന് കണ്ടെത്താൻ നടന്നി​ട്ട് കാര്യമി​ല്ല. ഇപ്പോഴുള്ള പ്രശ്നം എത്രയും വേഗം എത്രയും മാന്യമായി​ പരി​ഹരി​ക്കുന്നതി​ലാണ് കാര്യം. എല്ലാ താൽക്കാലി​ക ജീവനക്കാരെയും ഒറ്റയടി​ക്ക് നി​യമനം നൽകി​ പരി​ഹരി​ക്കേണ്ട അത്യാവശ്യമൊന്നും ഇവി​ടെയി​ല്ല. അവർക്ക് നാളെ ജോലി നഷ്ടമൊന്നും ഉണ്ടാകുന്നുമില്ലല്ലോ.

എല്ലാ റാങ്ക് ലി​സ്റ്റുകളി​ൽ നി​ന്ന് ഉടനെ നി​യമനം നടത്തുകയും പ്രായോഗി​കമല്ല. കാലഹരണപ്പെട്ട പൊലീസ് സി​.പി​.ഒ റാങ്ക് ലി​സ്റ്റി​ന്റെ കാര്യത്തി​ൽ സർക്കാർ അടി​യന്തരമായി​ ഇടപെടണം. കാലാവധി​ തീരാറായ റാങ്കുലി​സ്റ്റുകളി​ൽ നി​ന്ന് പറ്റാവുന്നത്ര നി​യമനം നടത്തണം. കാലപരിധിയിൽ നിന്ന് കൊവിഡ് കാലം ഇളവു ചെയ്യണം. താൽക്കാലിക നിയമനങ്ങൾക്ക് നൽകുന്ന പ്രാമുഖ്യം റാങ്ക് ലിസ്റ്റിനും നൽകണം.

നാൾ ചെല്ലുംതോറും സർക്കാർ ജോലിയുടെ എണ്ണം കുറഞ്ഞു വരികയേയുള്ളൂ. ഇ ഗവേണൻസി​ന്റെ കാലത്ത് ഇനി പഴയപോലെ തസ്തികകളൊന്നും വേണ്ടിവരില്ല. പുതിയ ലോകത്ത് പുതിയ ജോലി സാദ്ധ്യതകളും ഉദയം ചെയ്യും. സർക്കാർ ജോലിയെന്ന സ്വപ്നം വരും തലമുറകൾക്ക് അന്യമാകാനാണിട. അതുവരേയ്ക്കും സർക്കാർ നിയമനങ്ങൾ സുതാര്യവും കാര്യക്ഷമവുമായി നടത്തുകയാണ് വേണ്ടത്. എംപ്ളോയ്മെന്റ് എക്സ്ചേഞ്ചുകളിലൂടെയും പി.എസ്.സി വഴിയും മാത്രം നിയമനമെന്ന കർക്കശ നിലപാടെടുക്കണം. നിയമനപ്രക്രിയക്ക് മൂന്നോ ആറോ മാസം കാലപരിധി നിശ്ചയിക്കണം. സെക്രട്ടേറിയറ്റിന് മുന്നിൽ സമരം ചെയ്യുന്ന യുവാക്കളുമായി സർക്കാർ നേരിട്ട് ചർച്ചകൾക്ക് തയ്യാറാകണം. അടിയന്തരമായി ഒത്തുതീർപ്പുണ്ടാക്കണം. മുഖ്യമന്ത്രി തന്നെ ഇതിന് മുൻകൈയെടുക്കണം. അവർ നമ്മുടെ കുഞ്ഞുങ്ങളാണ്. പഠിച്ച് പാസായവരാണ്. അവരെ വിഷമിപ്പിക്കരുത്...