മൂവാറ്റുപുഴ: മതസൗഹാർദ്ദത്തിന്റെയും മാനവഐക്യത്തിന്റെയും മഹിതമായ സന്ദേശമുയർത്തികൊണ്ട് മുളവൂർ സെൻട്രൽ ജമാഅത്തിന്റെ ആഭിമുഖ്യത്തിൽ എല്ലാ വർഷവും നടക്കുന്ന ചന്ദനക്കുട മഹാമഹം(ഉറൂസ് മുബാറക്ക്) ഇന്ററിം മുതവല്ലി കെ.എ.മുഹമ്മദ് ആസിഫ് കൊടിയേറ്റി. സയ്യിദ് റഫീഖ് തങ്ങൾ ബുഖാരി പായിപ്ര, ഉസ്മാൻ ബാഖവി ചെമ്പറക്കി, അൻസാർ മുണ്ടാട്ട്, ഷാജഹാൻ വി.എ, ഇബ്രാഹിം വാരിക്കാട്ട് എന്നിവർ പങ്കെടുത്തു. കൊവിഡ്19 പ്രോട്ടക്കോൾ പ്രകാരം നാല് ദിവസങ്ങളിലായിട്ടാണ് ഈ വർഷത്തെ ചന്ദനക്കുട മഹാമഹം നടക്കുന്നത്. സമൂഹ സിയാറത്തിന് സയ്യിദ് ഷറഫുദ്ദീൻ തങ്ങൾ സഅദി അൽ മുഖൈബലി നേതൃത്വം നൽകി. പെരുമറ്റം ജുമാ മസ്ജിദ് ചീഫ് ഇമാം ഹസൻ അഷറഫി ഫാളിൽ ബാഖവി പ്രഭാഷണത്തിന് നേതൃത്വം നൽകി. തുടർന്ന് വാരിക്കാട്ട് കവല മസ്ജിദുൽ ഹുദാ അങ്കണത്തിലും മലേപള്ളിയിലും കൊടിയേത്തി. അന്നദാനവും നടന്നു. രാത്രി നടന്ന മൗലീദ് സദസിന് സയ്യിദ് ഷഹിർ തങ്ങൾ അൽ ഐദറൂസി നേതൃത്വം നൽകി. ഇന്ന്(ബുധൻ) രാത്രി എട്ടിന് നടക്കുന്ന മൗലീദ് സദസ്സിന് സയ്യിദ് ഷെഫീഖ് തങ്ങൾ ഫൈസി അൽ ബുഖാരി നേതൃത്വം നൽകും.