ഇടുക്കി: സംസ്ഥാന പട്ടികജാതി പട്ടികവർഗ്ഗ വികസന കോർപ്പറേഷൻ ദേശീയ പട്ടികജാതി ധനകാര്യ വികസന കോർപ്പറേഷന്റെ സഹായത്തോടെ നടപ്പിലാക്കുന്ന 60,000 രൂപ പദ്ധതി തുകയ്ക്കുള്ള സ്വയം തൊഴിൽ വായ്പാ പദ്ധതിയായ മൈക്രോ ക്രെഡിറ്റ് ഫിനാൻസ് പദ്ധതിക്കു കീഴിൽ വായ്പ അനുവദിക്കുന്നതിനായി കേരളത്തിലെ പട്ടികജാതിയിൽപ്പെട്ട തൊഴിൽരഹിതരിൽ നിന്നും അപേക്ഷ ക്ഷണിച്ചു.അപേക്ഷകർ പട്ടികജാതിയിൽപ്പെട്ട തൊഴിൽ രഹിതരും, 18നും 55നും മദ്ധ്യേ പ്രായമുള്ളവരുമായിരിക്കണം. കുടുംബ വാർഷിക വരുമാനം 3,00,000 രൂപയിൽ കവിയാൻ പാടില്ല. ഈ പദ്ധതി പ്രകാരം അനുവദനീയമായ വായ്പാ തുകയ്ക്കുള്ളിൽ വിജയസാദ്ധ്യതയുള്ള ഏതൊരു സ്വയംതൊഴിൽ പദ്ധതിയിലും (കൃഷിഭൂമി വാങ്ങൽ/ മോട്ടോർ വാഹനം വാങ്ങൽ ഒഴികെ) ഗുണഭോക്താവിന് ഏർപ്പെടാം.

വായ്പ തുക 5 ശതമാനം പലിശ സഹിതം 3 വർഷം കൊണ്ട് തിരിച്ചടക്കണം. തിരെഞ്ഞടുക്കപ്പെടുന്നവർ ഈടായി കോർപ്പറേഷന്റെ നിബന്ധനകൾക്കനുസരിച്ച് ആവശ്യമായ ഉദ്യോഗസ്ഥ ജാമ്യമോ, വസ്തു ജാമ്യമോ ഹാജരാക്കണം. .

താൽപ്പര്യമുള്ളവർ അപേക്ഷ ഫോറത്തിനും വിശദ വിവരങ്ങൾക്കുമായി കോർപ്പറേഷന്റെ ജില്ലാ കാര്യാലയവുമായി ബന്ധപ്പെടണം. ഫോൺ: 04862 232365, 9400068506