മറയൂർ: സംരക്ഷിത ഇനത്തിൽപെട്ട നക്ഷത്ര ആമയുമായി ദമ്പതികൾ പിടിയിൽ. മറയൂർ ഇന്ദ്രകോളണി സ്വദേശി മുരുകൻ (55), ഭാര്യ കവിത (33) എന്നിവരാണ് പിടിയിലായത്. വെള്ളിയാഴ്ച വൈകിട്ടോടുകൂടി വനപാലകർക്ക് ലഭിച്ച രഹസ്യവിവരത്തെ തുടർന്ന് നടത്തിയ പരിശോധനയിലാണ് മുരുകന്റെ വീട്ടിൽ ബക്കറ്റിനുള്ളിൽ സൂക്ഷിച്ച നിലയിൽ ആമയെ കണ്ടെത്തിയത്. രണ്ട് ദിവസം മുമ്പ് ചിന്നാർ വന്യജീവി സങ്കേതത്തിന് സമീപം പാമ്പാറിന് തീരത്ത് വിറക് ശേഖരിക്കുന്നതിനിടെയാണ് കവിതയ്ക്ക് നക്ഷത്ര ആമയെ കിട്ടിയത്. തുടർന്ന് വീട്ടിലെത്തിച്ച് ഭർത്താവ് മുരുകൻ വിൽപനയ്ക്കൊരുങ്ങവെയാണ് വനപാലകരുടെ പിടിയിലായത്. ഏകദേശം ആറ് വയസ് പ്രായമുള്ള പെൺ നക്ഷത്ര ആമയാണിതെന്നും പൂർണ ആരോഗ്യത്തോടെയാണുള്ളതെന്നും വനപാലകർ പറഞ്ഞു. ആർ.എഫ്.ഒ ബി. രഞ്ചിത്ത് കുമാറിന്റെ നേതൃത്വത്തിൽ ഡി.എഫ്.ഒ എസ്. ഇന്ദ്രജിത്ത്, എം.ജി. വിനോദ് കുമാർ, ബി.എഫ്.ഒമാരായ പി.ആർ. ഹരികുമാർ, കെ. രാമകൃഷ്ണൻ, അശ്വിൻ വിക്രമൻ, എസ്.എഫ്.ഒ എൽബിൻ എന്നിവരടങ്ങുന്ന വനപാലക സംഘമാണ് പരിശോധനയിൽ പങ്കെടുത്തതും പ്രതികളെ പിടികൂടിയതും. പ്രതികളെ ഇന്നലെ ദേവികുളം കോടതിയിൽ ഹാജരാക്കി.