മൂന്നാർ: പെട്ടിമുടി ദുരന്തബാധിതർക്കായി കുറ്റിയാർവാലിയിൽ നിർമ്മിച്ച വീടുകളുടെ താക്കോൽദാനം ഇന്ന് നടക്കും. താക്കോൽദാനം മന്ത്രി എം.എം. മണി നിർവഹിക്കും. രാവിലെ ഒമ്പതിന് മൂന്നാർ ടീ കൗണ്ടിയിൽ നടക്കുന്ന ചടങ്ങിൽ മന്ത്രിമാരായ ഇ. ചന്ദ്രശേഖരൻ, ടി.പി. രാമകൃഷ്ണൻ തുടങ്ങിയവർ ഓൺലൈനായി സംബന്ധിക്കും. എസ്. രാജേന്ദ്രൻ എം.എൽ.എ അദ്ധ്യക്ഷത വഹിക്കും. ചടങ്ങിന് ശേഷം മന്ത്രി എം. എം. മണി കുറ്റിയാർവാലിയിലെത്തി കുടുംബങ്ങൾക്ക് താക്കോൽ കൈമാറും.

സർക്കാർ അനുവദിച്ച ഭൂമിയിൽ കണ്ണൻ ദേവൻ പ്ലാന്റേഷൻ കമ്പനിയാണ് വീടുകൾ നിർമ്മിച്ചത്. ദുരന്തത്തിൽ വീട് പൂർണമായും നഷ്ടപ്പെട്ട ശരണ്യ അന്നലക്ഷ്മി, സരസ്വതി, സീതാലക്ഷ്മി, ദീപൻ ചക്രവർത്തി പളനിയമ്മ, ഹേമലത ഗോപിക, കറുപ്പായി, മുരുകേശ്വരി മാലയമ്മാൾ എന്നിവർക്കാണ് വീട് നിർമ്മിച്ചു നൽകുന്നത്. നവംബർ ഒന്നിനാണ് തറക്കല്ലിട്ട് നിർമ്മാണം ആരംഭിച്ചത്.