തൊടുപുഴ: സി.പി.ഐ കേന്ദ്ര സെക്രട്ടേറിയറ്റ് അംഗം ബിനോയ് വിശ്വം
നയിക്കുന്ന എൽ.ഡി.എഫ് വികസന മുന്നേറ്റ ജാഥ 17, 18 തീയതികളിൽ ജില്ലയിൽ പര്യടനം നടത്തുമെന്ന് എൽ.ഡി.എഫ് നേതാക്കൾ വാർത്താസമ്മേളനത്തിൽ പറഞ്ഞു. വികസനത്തിന്റെയും ജനക്ഷേമത്തിന്റെയും രാഷ്ട്രീയം ഉയർത്തി രണ്ട് ജാഥകളാണ് സംസ്ഥാനത്ത് പര്യടനം നടത്തുന്നത്. കാസർകോട് നിന്ന് ആരംഭിച്ച സി.പി.എം സംസ്ഥാന സെക്രട്ടറി എ. വിജയരാഘവന്റെ നേതൃത്വത്തിലുള്ള ജാഥ 26ന് തൃശൂരിൽ സമാപിക്കും. ഇന്ന് എറണാകുളത്ത് നിന്ന് ആരംഭിക്കുന്ന ബിനോയ് വിശ്വം നയിക്കുന്ന തെക്കൻമേഖല ജാഥ 26ന് തിരുവനന്തപുരത്ത് സമാപിക്കും. തെക്കൻമേഖല ജാഥയിൽ സി.പി.എം സംസ്ഥാന സെക്രട്ടേറിയറ്റ് അംഗം എം.വി. ഗോവിന്ദൻ മാസ്റ്റർ, സി.പി.ഐ സംസ്ഥാന എക്‌സിക്യൂട്ടീവ് അംഗം പി. വസന്തം, തോമസ് ചാഴിക്കാടൻ എം.പി (കേരള കോൺഗ്രസ്- എം), സാബു ജോർജ്ജ് (ജെ.ഡി.എസ്), വർക്കല ബി. രവികുമാർ (എൻ.സി.പി), മാത്യൂസ് കോലഞ്ചേരി (കോൺ. എസ്), വി. സുരേന്ദ്രൻ പിള്ള (എൽ.ജെ.ഡി), എം.വി. മാണി (കെ.സി.ബി), അബ്ദുൾ വഹാബ് (ഐ.എൻ.എൽ), ഷാജി കടമല (കേരള കോൺഗ്രസ് സ്‌കറിയ), ജോർജ്ജ് അഗസ്റ്റ്യൻ (ജനാധിപത്യ കേരള കോൺഗ്രസ്) എന്നിവർ അംഗങ്ങളാണ്. ബി.ജെ.പിയും യു.ഡി.എഫും ചേർന്ന് നടത്തുന്ന കള്ളപ്രചരണങ്ങൾ തുറന്നുകാണിക്കാനും സർക്കാരിന്റെ വികസനജനക്ഷേമ നടപടികൾ ജനങ്ങളിൽ പ്രചരിപ്പിക്കുന്നതിനുമായി പര്യടനം നടത്തുന്ന ജാഥയ്ക്ക് ഉജ്ജ്വല വരവേൽപ്പ് നൽകുന്നതിനുള്ള ഒരുക്കങ്ങൾ ജില്ലയിൽ പൂർത്തിയായതായി നേതാക്കൾ പറഞ്ഞു. 17ന് രാവിലെ 10ന് അടിമാലി, 12ന് നെടുങ്കണ്ടം, രണ്ടിന് കട്ടപ്പന, അഞ്ചിന് വണ്ടിപ്പെരിയാർ, 18ന്
രാവിലെ 10ന് തൊടുപുഴ എന്നിങ്ങനെയാണ് ജാഥ സഞ്ചരിക്കുന്നത്. വാർത്താ സമ്മേളത്തിൽ എൽ.ഡി.എഫ് ജില്ലാ കൺവീനർ കെ.കെ ശിവരാമൻ, സി.പി.എം ജില്ലാ സെക്രട്ടറി കെ.കെ. ജയചന്ദ്രൻ, എം.കെ. ജോസഫ് (ജെ.ഡി.എസ്), അനിൽ കൂവപ്ലാക്കൻ (എൻ.സി.പി), ജോസ് പാലത്തിനാൽ (കേരള കോൺഗ്രസ്- എം), ജോർജ്ജ് അഗസ്റ്റ്യൻ (ഡി.കെ.സി), ജോണി ചെരിവുപുറം (കെ.സി.എസ്), എൻ.എൻ സുലൈമാൻ (ഐ.എൻ.എൽ), പോൾസൺ മാത്യു (കേരള കോൺഗ്രസ്- ബി),
സോമശേഖരൻ നായർ (എൽ.ജെ.ഡി), പി.കെ. വിനോദ് (കോൺ. എസ്) തുടങ്ങിയവർ പങ്കെടുത്തു.