ഇടുക്കി : ജില്ലയുടെ സമഗ്ര വികസനം ലക്ഷ്യമാക്കിയുള്ള ഇടുക്കി പാക്കേജ് പ്രഖ്യാപനം നാളെ രാവിലെ 11 ന് മുഖ്യമന്ത്രിപിണറായി വിജയൻ നിർവഹിക്കുമെന്ന് സ്വാഗതസംഘം ചെയർമാൻ റോഷി അഗസ്റ്റിൻ എംഎൽഎ യും കൺവീനർ സി വി വർഗീസും പത്രസമ്മേളനത്തിൽ അറിയിച്ചു.
ശാസ്ത്രീയമായ പഠനങ്ങളുടെ അടിസ്ഥാനത്തിൽ വിദഗ്ദ്ധരുടെ സഹായത്തോടെ തയ്യാറാക്കിയിട്ടുള്ള ഇടുക്കിയുടെ ദീർഘകാല വികസന പരിപ്രേക്ഷ്യമായി 'മാറും ഈ പാക്കേജ് .
സർവതല സ്പർശിയായ വികസന കാഴ്ചപ്പാട് അന്വർത്ഥമാക്കുന്നതിനും ജില്ലയുടെ വികസനം പ്രായോഗികതലത്തിൽ നടപ്പാക്കുന്നതിനു മുള്ള അഞ്ചുവർഷത്തെ 10,000 കോടി രൂപ മുതൽമുടക്ക് പ്രതീക്ഷിക്കുന്നതാണ് ഈ പാക്കേജ് .പ്രത്യുൽപാദനപരമായ മൂലധനനിക്ഷേപം ജില്ലയുടെ സുസ്ഥിര വികസനത്തിന് ആക്കം കൂട്ടുമെന്നും അവർ പറഞ്ഞു. .
വ്യാഴാഴ്ച രാവിലെ 11 ന് കട്ടപ്പനയിൽ എത്തിച്ചേരുന്ന മുഖ്യമന്ത്രിയെയും മന്ത്രിമാരെയും ജില്ലാ കളക്ടർ എച്ച് ദിനേശന്റെ നേതൃത്വത്തിൽ സ്വീകരിച്ച് ആനയിക്കും. കട്ടപ്പന പഴയ ബസ് സ്റ്റാൻഡിൽ പ്രത്യേകം തയ്യാറാക്കിയ വേദിയിൽ നടക്കുന്ന സമ്മേളനത്തിൽധനകാര്യ മന്ത്രി ഡോ. ടി എം തോമസ് ഐസക്ക് അദ്ധ്യക്ഷത വഹിക്കും.റവന്യൂ മന്ത്രി ഇ. ചന്ദ്രശേഖരൻ ,
വൈദ്യുതി മന്ത്രി എം. എം .മണി, സംസ്ഥാന ആസൂത്രണ ബോർഡ് വൈസ് ചെയർമാൻ ഡോ. വി .കെ രാമചന്ദ്രൻ എന്നിവർ മുഖ്യാതിഥികളായി പങ്കെടുക്കും. ഡീൻ കുര്യാക്കോസ് എം. പി, എംഎൽഎമാരായ പി ജെ ജോസഫ് , ഇ എസ് ബിജിമോൾ, എസ് രാജേന്ദ്രൻ, മുൻസിപ്പൽ ചെയർപേഴ്‌സൻ ബീന ജോബി,ജില്ലാ പഞ്ചായത്ത് പ്രസിഡന്റ് ജിജി. കെ ഫിലിപ്പ്, ജില്ലാ കളക്ടർ എച്ച് ദിനേശൻ തുടങ്ങിയവർ പ്രസംഗിക്കും. സ്വാഗതസംഘം ചെയർമാൻ റോഷി അഗസ്റ്റിൻ എംഎൽഎ സ്വാഗതവും കൺവീനർ സി വി വർഗീസ് നന്ദിയും പറയും.