കാസർകോട്: കാർഷിക മേഖലയ്ക്ക് മുൻഗണന നൽകുകയും നവീനമായ ഒട്ടേറെ പദ്ധതികൾ വിഭാവനം ചെയ്തുകൊണ്ടുമുള്ള കാസർകോട് ജില്ലാ പഞ്ചായത്തിന്റെ 2021-22 വർഷത്തെ ബഡ്ജറ്റ് വൈസ് പ്രസിഡന്റ് ഷാനവാസ് പാദൂർ അവതരിപ്പിച്ചു. മുൻ വർഷത്തെ നീക്കിയിരുപ്പ് ഉൾപ്പെടെ 97,03,24,637 രൂപ വരവും 95,37,22,000 രൂപ ചെലവും 1,66,02,637 രൂപ മിച്ചവും കണക്കാക്കുന്നതാണ് ബഡ്ജറ്റ്. ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ അദ്ധ്യക്ഷത വഹിച്ചു. ജില്ലയിലെ കാർഷിക ഉത്പന്നങ്ങൾ വാങ്ങുന്നതിനും വിപണനം ചെയ്യുന്നതിനും ന്യായ വില ഉറപ്പാക്കുന്നതിനും ഒരു കേന്ദ്രീകൃത സംവിധാനം നിലവിൽ വരുത്തുമെന്ന പ്രഖ്യാപനം ഉൾപ്പെടെ ജില്ലയുടെ വികസന മുന്നേറ്റത്തിന് കളമൊരുക്കുന്ന ബഡ്ജറ്റിനെ പ്രതിപക്ഷ പാർട്ടികളും സ്വാഗതം ചെയ്തു.

ജില്ലയുടെ വികസന സാദ്ധ്യതകൾ ഏകോപിപ്പിക്കുന്നതിന് വിദ്യാർത്ഥികൾക്കും ഗവേഷകർക്കുമായി കാസർകോട് സെന്റർ ഫോർ ഡവലപ്പ്മെന്റ് സ്റ്റഡീസ് സ്ഥാപിക്കുമെന്ന ബജറ്റിലെ നിർദ്ദേശം പിന്നോക്കം നിൽക്കുന്ന ജില്ലയുടെ വികസന പ്രശ്നങ്ങൾ കാണുന്നതിനും അതിനെ കുറിച്ച് ഗവേഷണം നടത്തുന്നതിനും രാഷ്ട്രീയ നേതൃത്വങ്ങൾക്കും ഭരണാധികാരികൾക്കും മാർഗ്ഗനിർദ്ദേശം നൽകുന്നതിന് സഹായകമാകും.

ആയിരം വനിതകളെ ബിരുദധാരികളാക്കുമെന്ന പ്രഖ്യാപനം ഏറെ പുതുമ പകരുന്നതാണ്. ജില്ലയിലെ ഗവേഷണ സ്ഥാപനങ്ങളെ പദ്ധതികളുമായി ബന്ധിപ്പിക്കാൻ ബഡ്ജറ്റിൽ തയ്യാറായിട്ടുണ്ട്. ഭിന്നലിംഗക്കാരുടെ ക്ഷേമത്തിന് വേണ്ടിയുള്ള പദ്ധതികളും ശ്രദ്ധേയമാണ്. കൊവിഡ് പ്രതിസന്ധി മറികടക്കാൻ ജില്ലയിലെ പ്രവാസികളുടെ ക്ഷേമവും കൂട്ടായ്മയും ഉറപ്പാക്കാനും നിക്ഷേപ സൗഹൃദ അന്തരീക്ഷമൊരുക്കാനുമായി ലോക കാസർകോട് സഭ രൂപീകരിക്കും. കർഷകരെ ചേർത്തു പിടിക്കാനും ജില്ലയിലെ കാർഷിക ഉത്പ്പന്നങ്ങൾ വാങ്ങുന്നതിനും വിൽക്കുന്നതിനും പെരിയയിൽ ബൃഹദ് കാർഷിക മൊത്ത വ്യാപര വിപണന കേന്ദ്രം സ്ഥാപിക്കും. ജില്ലയിലെ സർക്കാർ ഭൂമികളുടെ സമഗ്ര വിവരശേഖരണത്തിനും വികസന സാദ്ധ്യതകൾ രേഖപ്പെടുത്തി വയ്ക്കുന്നതിനും 'റീ വെന്യു' എന്ന പേരിൽ പുതിയ പദ്ധതി.

യുവജനങ്ങൾക്കായി ജില്ലാ പഞ്ചായത്ത് യൂത്ത് ഇന്റേൺഷിപ്പ് പ്രോഗ്രാം ജില്ലയുടെ വിവിധ കേന്ദ്രങ്ങളിൽ കായിക മേഖലയ്ക്കായി ടർഫുകൾ ആരംഭിക്കും, കില, ഐ.എം.ജി, ജില്ലാ ഭരണകൂടം എന്നിവയുമായി ചേർന്ന് വിവരാവകാശ നിയമം, സേവനാവകാശ നിയമം എന്നിവയിൽ ജീവനക്കാർക്കും ജനപ്രതിനിധികൾക്കും ജനങ്ങൾക്കുമായി ജില്ലയെ സേവന സൗഹൃദ ജില്ലയാക്കി മാറ്റും. തൊഴിലുറപ്പ് പദ്ധതിയിലൂടെ നദികളുടെ സംരക്ഷണത്തിനായി പദ്ധതി. നെയ്യം കയ്യം ജൈവകേന്ദ്രത്തിന്റെ സംരക്ഷണം, ജലക്ഷാമം പരിഹരിക്കുന്നതിനായി ദീർഘവീക്ഷണത്തോടെ ജല ബ‌ഡ്ജറ്റ്, ട്രാൻസ്ജെൻഡേഴ്സിനായി ഷെൽട്ടറും സ്വയം തൊഴിൽ കേന്ദ്രവും,യുവാക്കൾക്കായി യൂത്ത് ക്ലീനിക്കുകൾ ആരംഭിക്കും തുടങ്ങിയവയാണ് ബഡ്ജറ്റിലെ പ്രധാന നിർദ്ദേശങ്ങൾ.