മട്ടന്നൂർ: മട്ടന്നൂരിൽ ഇലക്ട്രിക് സ്‌കൂട്ടർ നിർമാണ യൂണിറ്റ് തുടങ്ങുന്നു. കേരള ഓട്ടോമൊബൈൽസ് ലിമിറ്റഡും ലോർഡ്‌സ് മാർക്ക് ഇൻഡസ്ട്രീസ് പ്രൈവറ്റ് ലിമിറ്റഡ് കമ്പനിയും ചേർന്നാണ് കീഴല്ലൂർ പഞ്ചായത്തിലെ മിനി വ്യവസായ പാർക്ക് കേന്ദ്രീകരിച്ച് സംരംഭം തുടങ്ങുന്നത്. ഈ വർഷം തന്നെ സ്‌കൂട്ടർ നിർമാണ കമ്പനി ഉത്പാദനം തുടങ്ങാനാണ് ലക്ഷ്യമിടുന്നതെന്ന് വ്യവസായമന്ത്രി ഇ.പി.ജയരാജൻ അറിയിച്ചു.

തുടക്കത്തിൽ മൂന്നു മോഡലുകളിലുള്ള സ്‌കൂട്ടറുകളാണ് കമ്പനി നിർമിക്കുക. 46000 രൂപ, 52000 രൂപ, 58000 രൂപ എന്നിങ്ങനെയായിരിക്കും ഇവയുടെ വിപണന വില. കമ്പനിയിൽ കേരള ഓട്ടോമൊബൈൽസ് ലിമിറ്റഡിന് 26 ശതമാനം ഓഹരിയും ലോർഡ്‌സിന് 74 ശതമാനം ഓഹരിയുമാണ് ഉണ്ടായിരിക്കുക. കമ്പനി പ്രവർത്തനം തുടങ്ങുന്നതോടെ നേരിട്ട് 71 പേർക്കും പരോക്ഷമായി 50ലധികം പേർക്കും തൊഴിൽ ലഭിക്കും.11.94 കോടി രൂപ ചെലവിട്ടാണ് ഇ-സ്‌കൂട്ടർ നിർമാണ ഫാക്ടറി തുടങ്ങുന്നത്. കേരള ഓട്ടോമൊബൈൽസ് ലിമിറ്റഡ് ഇപ്പോൾ നിർമിച്ചു കൊണ്ടിരിക്കുന്ന നീംജി ഇലക്ട്രിക്കൽ ഓട്ടോറിക്ഷയ്ക്ക് വലിയ സ്വീകാര്യതയാണ് ലഭിക്കുന്നത്. നീംജി ഇലക്ട്രിക്കൽ ഓട്ടോറിക്ഷ നേപ്പാളിലേക്ക് കയറ്റുമതി ചെയ്യുന്നുണ്ട്.