തലശേരി: 25ാമത് രാജ്യാന്തര ചലച്ചിത്ര മേളയുടെ തലശ്ശേരി പതിപ്പിലെ രണ്ടാം ദിനത്തിൽ ചലച്ചിത്ര പ്രേമികൾ ആകാംഷാപൂർവ്വം കാത്തിരുന്ന ചുരുളി ഉൾപ്പടെ 23 ചിത്രങ്ങൾ പ്രദർശനത്തിന്. ലിജോ ജോസ് പെല്ലിശ്ശേരി സംവിധാനം ചെയ്ത ചുരുളി തിരുവന്തപുരത്തും കൊച്ചിയിലും മികച്ച പ്രേക്ഷക പ്രതികരണം നേടിയിരുന്നു. മേളയുടെ മത്സര വിഭാഗത്തിൽ ഉൾപ്പെട്ടിരിക്കുന്ന ചിത്രം ഉച്ചയ്ക്ക് 2.45 ന് ലിബർട്ടി ലിറ്റിൽ പാരഡൈസിലാണ് പ്രദർശിപ്പിക്കുക.

മോഹിത് പ്രിയദർശി സംവിധാനം ചെയ്ത ഹിന്ദി ചിത്രം കൊസയും മത്സരവിഭാഗത്തിൽ പ്രദർശിപ്പിക്കും. അസർബൈജാനിയൻ ചിത്രം ബിലേസുവർ, വിയറ്റ്‌നാമീസ് ചിത്രം റോം, ബ്രസീലിയൻ ചിത്രം മെമ്മറി ഹൗസ്, മെക്‌സിക്കൻ ചിത്രം ബേർഡ് വാച്ചിങ് തുടങ്ങിയവയാണ് രണ്ടാം ദിനത്തിലെ മത്സര ചിത്രങ്ങൾ. ഡോൺ പാലത്തറ സംവിധാനം ചെയ്ത മലയാള ചിത്രം 1956, മധ്യതിരുവിതാംകൂർ, ഗിരീഷ് കാസറവള്ളിയുടെ ഇല്ലിലാരെ അല്ലിഗ ഹോഗല്ലാരെ എന്നീ ചിത്രങ്ങളും കലൈഡോസ്‌കോപ്പ് വിഭാഗത്തിൽ ഇന്ന് പ്രദർശനത്തിനെത്തുന്നുണ്ട്.
ലോക സിനിമാ വിഭാഗത്തിൽ നോ വെയർ സ്‌പെഷ്യൽ, ഓസ്‌ട്രേലിയൻ ചിത്രം ഹൈ ഗ്രൗണ്ട്, സാറ്റർഡേ ഫിക്ഷൻ, ദക്ഷിണ കൊറിയൻ ചിത്രം ദി വുമൺ ഹൂ റാൻ തുടങ്ങിയ ഏഴു ചിത്രങ്ങളും ഇന്ത്യൻ സിനിമ വിഭാഗത്തിൽ അരുൺ കാർത്തിക്ക് സംവിധാനം ചെയ്ത നാസിറും പ്രദർശിപ്പിക്കും.

മഹേഷ് നാരായണൻ സംവിധാനം ചെയ്ത സീ യൂ സൂൺ, വിപിൻ ആറ്റ്‌ലിയുടെ മ്യൂസിക്കൽ ചെയർ, കെ. പി. കുമാരന്റെ ഗ്രാമവൃക്ഷത്തിലെ കുയിൽ എന്നീ ചിത്രങ്ങൾ മലയാള സിനിമ വിഭാഗത്തിൽ ഇന്ന് പ്രദർശിപ്പിക്കും.
മാജിക്കൽ റിയലിസത്തിലൂടെ ഋതുക്കൾ ചിത്രീകരിക്കുന്ന കിം കി ഡുക്കിന്റെ സ്പ്രിങ്, സമ്മർ, ഫാൾ, വിന്റർ ആൻഡ് സ്പ്രിങ്, ഛായാഗ്രാഹകൻ രാമചന്ദ്ര ബാബുവിന് ആദരം അർപ്പിക്കുന്ന അഗ്രഹാരത്തിൽ കഴുതൈ, സംവിധായകനും എഴുത്തുകാരനുമായ സൗമിത്ര ചാറ്റർജിക്ക് ആദരമായി ചാരുലത എന്നിവയും ഇന്ന് പ്രദർശിപ്പിക്കും. സത്യജിത് റേ സംവിധാനം ചെയ്ത ഈ ചിത്രം ലിബർട്ടി സ്യൂട്ടിൽ വൈകിട്ട് ഏഴിനാണ് പ്രദർശിപ്പിക്കുക.