കോഴിക്കോട്: എലത്തൂർ നിയോജകമണ്ഡലത്തിലെ വിവിധ പ്രവൃത്തികളുടെ ഉദ്ഘാടനം ഗതാഗത മന്ത്രി എ. കെ ശശീന്ദ്രൻ നിർവഹിച്ചു. കാക്കൂർ പഞ്ചായത്തിലെ രാമല്ലൂർ തോട് പാലം - അപ്രോച്ച് റോഡ് പ്രവൃത്തി, എലത്തൂർ കാട്ടിൽ കോളനി ഡ്രൈനേജ് കം ഫൂട്ട്പാത്ത്, ചേളന്നൂർ - മുത്തുവാട്ടുതാഴം 9/5 റോഡ്, ചെറുവറ്റ - മുണ്ടോടി പൊറ്റമ്മൽ - കായക്കാളി റോഡ് എന്നിവയാണ് ഉദ്ഘാടനം ചെയ്തത്. എം.എൽ.എയുടെ ആസ്തി വികസന ഫണ്ടിൽ നിന്നും 50 ലക്ഷം രൂപ വിനിയോഗിച്ചാണ് രാമല്ലൂർ പാലം - അപ്രോച്ച് റോഡ് എന്നിവ നിർമ്മിക്കുന്നത്. എലത്തൂർ കാട്ടിൽ കോളനി ഡ്രൈനേജ് കം ഫൂട്ട്പാത്ത് നിർമ്മാണത്തിനായി 10 ലക്ഷം രൂപയാണ് എം. എൽ. എ ഫണ്ടിൽ നിന്ന് വകയിരുത്തിയത്. ചേളന്നൂർ - മുത്തുവാട്ടുതാഴം 9/5 റോഡിന് എം. എൽ.എ ആസ്തി വികസന ഫണ്ടിൽ നിന്നും 13 ലക്ഷം രൂപയാണ് വിനിയോഗിച്ചത്. ഇറിഗേഷൻ വകുപ്പാണ് പദ്ധതി നിർവഹണം നടത്തിയത്. പ്രളയ പുനരുദ്ധാരണ പദ്ധതിയിൽ ഉൾപ്പെടുത്തിയാണ് കുരുവട്ടൂർ പഞ്ചായത്തിലെ ചെറുവറ്റ - മുണ്ടോടി പൊറ്റമ്മൽ - കായക്കാളി റോഡ് നിർമ്മാണം പൂർത്തീകരിച്ചത്. 10 ലക്ഷം രൂപയാണ് വിനിയോഗിച്ചത്.