 പ്രവൃത്തി ഉദ്ഘാടനം ഇന്ന്

 222 കോടിയുടെ പദ്ധതി

മുക്കം: റീബിൽഡ് കേരളയിൽ ഉൾപ്പെടുത്തി 222 കോടി രൂപ ചെലവിൽ കൊയിലാണ്ടി- എടവണ്ണ സംസ്ഥാനപാത അത്യാധുനിക രീതിയിൽ നവീകരിക്കുന്നു. പ്രവൃത്തി ഉദ്ഘാടനം ഇന്ന് വൈകിട്ട് 3ന് മുഖ്യമന്ത്രി പിണറായി വിജയൻ നിർവഹിക്കും. ജോർജ് എം.തോമസ് എം.എൽ.എ അദ്ധ്യക്ഷത വഹിക്കും. കൊയിലാണ്ടി മുതൽ മലപ്പുറം ജില്ലയുടെ അതിർത്തിയായ എരഞ്ഞിമാവ് വരെയുള്ള 51. 02 കിലോമീറ്റർ റോഡിന്റെ പുനർനിർമ്മാണത്തിനുള്ള ടെൻഡർ നടപടിയാണ് ഒടുവിൽ പൂർത്തിയായത്. മലപ്പുറം ജില്ലയിൽ ഉൾപ്പെട്ട ഭാഗം നേരത്തേ 160 കോടി രൂപയ്ക്ക് ടെൻഡർ ചെയ്തതായിരുന്നു.

കൊയിലാണ്ടി - പൂനൂർ, പൂനൂർ - ഓമശ്ശേരി, ഓമശ്ശേരി - എരഞ്ഞിമാവ് എന്നീ മൂന്ന് റീച്ചുകളുടെ നിർമ്മാണത്തിനുള്ള 222 കോടി രൂപയുടെ കരാർ തിരുവനന്തപുരം ആസ്ഥാനമായ ശ്രീധന്യ കൺസ്ട്രക്‌ഷൻസിനാണ് ലഭിച്ചത്. കൂടുതൽ വീതി ലഭ്യമാകുന്ന ഇടങ്ങളിൽ 12 മീറ്റർ കാര്യേജ് വേയുണ്ടായിരിക്കും. കലുങ്കുകൾ, പാലങ്ങൾ എന്നിവയുടെ നിർമ്മാണവും പരിപാലനവും ഡ്രെയ്നേജുകൾ, ടൈൽ വിരിച്ച ഹാൻഡ് റെയിലോടു കൂടിയ നടപ്പാതകൾ, പ്രധാന ജംഗ്ഷനുകളുടെ സൗന്ദര്യവത്കരണം, തെരുവുവിളക്കുകൾ തുടങ്ങിയവയും നവീകരണ പദ്ധതിയിലുൾപ്പെടും. ദേശീയാടിസ്ഥാനത്തിലുള്ള ശ്രീധന്യയ്ക്ക് പുറമെ യു.എൽ.സി.സി.എസ്, ഇ.പി.ഐ, ചെറിയാൻ വർക്കി എന്നീ സ്ഥാപനങ്ങളും ടെൻഡറിൽ പങ്കെടുത്തിരുന്നു. ഒന്നര വർഷമാണ് നിർമാണ കാലയളവ്.