നാദാപുരം: നാദാപുരം നിയോജക മണ്ഡലത്തിൽ മാവോയിസ്റ്റ് ഭീഷണി നിലവിലുള്ള പോളിംഗ് ബൂത്തുകളിൽ ഉന്നത പൊലീസ് ഉദ്യോഗസ്ഥരുടെ നേതൃത്വത്തിലുള്ള സംഘം പരിശോധന നടത്തി. വിലങ്ങാട് സെന്റ് ജോർജ് ഹൈസ്‌കൂൾ, അഭയഗിരി ഗവ. വെൽഫയർ സ്‌കൂൾ, ഇന്ദിര നഗർ വില്ലേജ് ഓഫീസ് തുടങ്ങിയ ബൂത്തുകളിലായിരുന്നു പരിശോധന.
ഇന്റലിജൻസ് റിപ്പോർട്ടുകളുടെ അടിസ്ഥാനത്തിൽ നാദാപുരം ഡിവൈ.എസ്.പി എ.പി.ശിവദാസ്, വളയം സി ഐ പി.ആർ.മനോജ് എന്നിവരുടെ നേതൃത്വത്തിലുള്ള സംഘമാണ് ബൂത്തുകളിലും പരിസരങ്ങളിലുമെത്തിയത്. മേഖലയിൽ മാവോയിസ്റ്റ് സാന്നിദ്ധ്യം സ്ഥിരീകരിച്ചിരിക്കെ, വന മേഖലയിൽ പട്രോളിംഗും നിരീക്ഷണവും ശക്തമാക്കുമെന്ന് ഡിവൈ. എസ് പി അറിയിച്ചു.
പ്രാഥമിക സന്ദർശനമായിരുന്നു പൊലീസ് സംഘത്തിന്റേത്. ബൂത്തുകളുടെ നിലവിലുള്ള സാഹചര്യവും സുരക്ഷയുമായി ബന്ധപ്പെട്ട കാര്യങ്ങളും സംബന്ധിച്ച് റൂറൽ എസ് പി യ്ക്ക് ഡിവൈ.എസ്.പി റിപ്പോർട്ട് സമർപ്പിക്കും.