കാണക്കാരി: പഞ്ചായത്തിലെ പാടശേഖരങ്ങളിൽ സുലഭമായി വെള്ളമെത്തിച്ച് തെന്നാട്ടു പടി തോട് വീണ്ടും കർഷകർക്ക് ആശ്വാസമേകും. മൂവാറ്റുപുഴയാറിന്റെ കൈവഴിയായ ഈ തോടിനെ ആശ്രയിച്ചാണ് കാണക്കാരി പടിഞ്ഞാറൻ മേഖലയിലെ നെൽകൃഷിയുടെ നിലനില്പ്. വശങ്ങൾ ഇടിഞ്ഞും മണ്ണും ജൈവാവശിഷ്ടങ്ങളും നിറഞ്ഞ് നീരൊഴുക്ക് തടസപ്പെട്ടും കിടന്ന സ്ഥിതിയിൽ നിന്നാണ് ഹരിത കേരളം മിഷൻ തോടിനെ പുനരുജ്ജീവിപ്പിക്കുന്നത്.

ജലസ്രോതസുകളുടെ വീണ്ടെടുപ്പ് ലക്ഷ്യമിടുന്ന ഇനി ഞാൻ ഒഴുകട്ടെ കാമ്പയിന്റെ മൂന്നാം ഘട്ടത്തിന് തുടക്കംകുറിച്ചായിരുന്നു ശുചീകരണം. ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി കാമ്പയിൻ ഉദ്ഘാടനം ചെയ്തു. കാണക്കാരി ഗ്രാമപഞ്ചായത്ത് പ്രസിഡന്റ് മിനു മനോജ് അദ്ധ്യക്ഷത വഹിച്ചു. ഹരിത കേരളം മിഷൻ ജില്ലാ കോ-ഓർഡിനേറ്റർ പി. രമേശ്, ദാരിദ്ര ലഘൂകരണ വിഭാഗം അസിസ്റ്റന്റ് പ്രോജക്ട് ഓഫീസർ ജെ .പ്രമീള കുമാരി, മൈനർ ഇറിഗേഷൻ എക്‌സിക്യൂട്ടീവ് എൻജിനിയർ ആർ.സുശീല തുടങ്ങിയവർ പങ്കെടുത്തു.