വൈക്കം : ഒരു വ്യാഴവട്ടക്കാലത്തിനിടയിൽ 111 പദ്ധതികൾക്ക് ശിലയിടാൻ നിയോഗം കിട്ടിയ അപൂർവ ഭാഗ്യത്തിനുടമയായി എസ്.എൻ.ഡി.പി യോഗം വൈക്കം യൂണിയൻ പ്രസിഡന്റ് പി.വി ബിനേഷ്. വൈക്കം ടൗൺ 111-ാം നമ്പർ ശാഖ നിർമ്മിക്കുന്ന പ്രാർത്ഥനാലയത്തിനാണ് 111-ാമത് ശിലാസ്ഥാപനം നടത്തിയത്. വൈക്കം യൂണിയൻ പ്രസിഡന്റ് പദവിയിൽ 14 വർഷം പിന്നിടുന്നു. യൂണിയന്റെ കീഴിലുള്ള 54 ശാഖകളിൽ ചെറുതും വലുതുമായ പദ്ധതികൾക്കാണ് ശിലാസ്ഥാപനത്തിലൂടെ ബിനേഷിന്റെ കൈയടയാളം പതിഞ്ഞത്. കാലത്തിന്റെ മാ​റ്റത്തിനൊത്ത് ശാഖായോഗം ആവിഷ്‌ക്കരിക്കുന്ന പദ്ധതികളുടെ ശിലാസ്ഥാപന കർമ്മം നടത്താൻ ബിനേഷ് തന്നെ വേണമെന്ന നിർബന്ധമാണ് ഓരോ ശാഖകൾക്കും. ബിനേഷ് കല്ലിട്ടാൽ അത് അനാഥമാകില്ലെന്ന വിശ്വാസമാണ് ഇതിനു പിന്നിൽ. അതുകൊണ്ടുതന്നെ ബിനേഷ് കല്ലിട്ട പദ്ധതികളിൽ 95% വും ലക്ഷ്യത്തിനൊത്ത് പൂർത്തിയായി. ശേഷിച്ചവ നിർമ്മാണ ഘട്ടത്തിലുമാണ്. ശാഖകൾ ലക്ഷ്യമിടുന്ന പദ്ധതികൾ യഥാസമയം പൂർത്തിയാക്കാനുള്ള ഊർജ്ജവും കരുതലും ബിനേഷിനുണ്ട്. ശിലാസ്ഥാപനം കഴിഞ്ഞാൽ അതിന്റെ വളർച്ചയും ഉയർച്ചയും ബിനേഷിന്റെ അന്വേഷണഭാഗമാണ്. കാലത്തിന്റെ മാ​റ്റങ്ങൾക്കൊത്ത് വികസന പദ്ധതികൾ ആവിഷ്‌ക്കരിക്കാൻ ശാഖായോഗങ്ങളെ പ്രാപ്തരാക്കുന്ന നിലപാടുകൾ ബിനേഷിന്റെ പ്രത്യേകതയാണ്. നടപ്പാക്കിയ പദ്ധതികളേറെയും ശാഖായോഗങ്ങളിലെ ക്ഷേത്രങ്ങൾ കേന്ദ്രീകരിച്ചായിരുന്നു. കൊടിമരം, ചു​റ്റമ്പലം, ശാഖാമന്ദിരങ്ങൾ, സ്വയംതൊഴിൽ പദ്ധതി കേന്ദ്രങ്ങൾ, ക്ഷേത്രങ്ങൾക്ക് ചു​റ്റുമതിൽ, ബലിക്കൽപുര, വനിതാ സ്വയംസഹായ സംഘങ്ങൾ, നടപ്പന്തൽ തുടങ്ങിയ പദ്ധതികൾക്കാണ് ബിനേഷിന്റെ കൈയടയാളത്തിൽ ശിലകൾ ഇട്ടത്. ടൗൺ ശാഖയിൽ നടന്ന ശിലാസ്ഥാപന ചടങ്ങിൽ ശാഖാ പ്രസിഡന്റ് എൻ.കെ. രമേശ് ബാബു അദ്ധ്യക്ഷത വഹിച്ചു. സെക്രട്ടറി കെ.കെ വിജയപ്പൻ, യോഗം അസി: സെക്രട്ടറി പി.പി സന്തോഷ്, വാർഡ് കൗൺസിലർ ആർ.സന്തോഷ്, അനിലാത്മജൻ,അനിൽ സച്ചിത്ത്, അനിൽകുമാർ, ലൈല ബാലകൃഷ്ണൻ,കെ.ചന്ദ്രൻ,അനിൽ പിഷാരത്ത്,ബിജു മൂശാറയിൽ,ഷീല ചന്ദ്രൻ,ബിജു ദയാന്ദൻ,യമുന,എസ്.ജയൻ എന്നിവർ പ്രസംഗിച്ചു.