കോട്ടയം: കോട്ടയം കെ.എസ്.ആർ.ടി.സി സ്റ്റാൻഡിലെ കാന്റീൻ പൊളിക്കും. പകരം പൊതുജനങ്ങളുടെ വാഹനങ്ങൾക്കും ഇന്ധനം നിറയ്ക്കാവുന്ന പമ്പ് സ്ഥാപിക്കും. കെ.എസ്.ആർ.ടി.സി പുനരുദ്ധാരണത്തിന്റെ ഭാഗമായാണ് പദ്ധതി.
സംസ്ഥാനത്ത് 67 ഡിപ്പോകളിൽ ഈ പദ്ധതി നടപ്പാക്കുന്നുണ്ട്. ഇന്ത്യൻ ഓയിൽ കോർപറേഷനുമായി കെ.എസ്.ആർ.ടി.സി ധാരണാ പത്രം ഒപ്പിട്ടു. കോട്ടയത്തെ ഡിപ്പോയ്ക്കുള്ളിലെ കൺസ്യൂമർ പമ്പിൽ നിന്ന് നിലവിൽ ഡീസൽ നൽകുന്നത് കെ.എസ്.ആർ.ടി.സി ബസുകൾക്ക് മാത്രമാണ്. സ്റ്റാൻഡിനകത്തുള്ള ഈ പമ്പ് സ്വകാര്യവാഹനങ്ങൾക്കായി തുറന്നു കൊടുത്താൽ സ്‌റ്രാൻഡിന്റെ പ്രവർത്തനത്തെ ബാധിക്കുമെന്നതിനാലാണ് റോഡരികിലെ കാന്റീനും അഡ്മിനിസ്ട്രേഷൻ വിഭാഗവും പ്രവർത്തിക്കുന്ന കെട്ടിടം പൊളിച്ചു മാറ്റി പമ്പ് സ്ഥാപിക്കുന്നത്.

 വരുന്നത് റീട്ടെയ്ൽ ഔട്ട്‌ ലെറ്റ്

ഡിപ്പോയുടെ മുൻവശത്ത് ആധുനിക ഓൺലൈൻ ഫ്യുവൽ മോണിറ്ററിംഗ് സംവിധാനമുള്ള റീട്ടെയ്ൽ ഔട്ട്‌ ലെറ്റാണ് സ്ഥാപിക്കുന്നത്. നിലവിൽ 2 ഡീസൽ ടാങ്കാണ് ഇവിടെ ഉള്ളത്. പെട്രോളിനായി ഒരു ടാങ്ക് കൂടി നിർമിക്കും. സ്ഥല സൗകര്യവും ചുറ്റുപാടും അനുയോജ്യമായതിനാലാണ് പദ്ധതിക്ക് അനുമതി കിട്ടിയത്. ചെലവ് മുഴുവൻ ഐ.ഒ.സി വഹിക്കും.

 വൈകിയേക്കും

പദ്ധതിക്കായുള്ള സ്ഥലത്തെ കെട്ടിടം പൊളിക്കുമ്പോൾ പകരം സൗകര്യം എവിടെ ഒരുക്കുമെന്നതിൽ തീരുമാനമായിട്ടില്ല. ശൗചാലയം,​ കഫറ്റേരിയ എന്നിവയും പമ്പിനോടനുബന്ധിച്ച് നിർമിക്കും. അധികം വൈകാതെ സി.എൻ.ജി, എൽ.എൻ.ജി സംവിധാനത്തിനുള്ള പദ്ധതിയുമുണ്ട്.

കെ.എസ്.ആർ.ടി.സി ജീവനക്കാരെയാകും ഡിപ്പോയിൽ ജോലിയ്ക്ക് നിയോഗിക്കുക. ചങ്ങനാശേരി,​ വൈക്കം ഡിപ്പോകളിലും പദ്ധതി ആലോചിക്കുന്നുണ്ട്.

 24 മണിക്കൂറും

പ്രവർത്തിക്കുന്ന

പെട്രോൾ,

ഡീസൽ പമ്പ്

'' പദ്ധതിക്കായി കാന്റീനിരിക്കുന്ന സ്ഥലവും പരിസരവും ഉപയോഗിക്കാമെന്നാണ് കണ്ടെത്തൽ. അധികമുള്ള ജീവനക്കാരെ പമ്പിൽ നിയോഗിക്കും. സ്ഥലം പാട്ടത്തിന് നൽകും. നിർമാണവും മറ്റും ഐ.ഒ.സി നേരിട്ടാണ്''

ഡി.ടി.ഒ, കോട്ടയം