മുണ്ടക്കയം ഈസ്റ്റ് : കാട്ടുപന്നി ശല്യത്തിൽ പൊറുതിമുട്ടി മുപ്പത്തിയഞ്ചാം മൈൽ ബോയിസ് എസ്റ്റേറ്റിൽ റബർ ടാപ്പിംഗ് തൊഴിലാളികൾ. ഒരാഴ്ചയ്ക്കിടെ ദമ്പതികൾ ഉൾപ്പെടെ 3 പേർക്കാണ് കാട്ടുപന്നിയുടെ ആക്രമണത്തിൽ പരിക്കേറ്റത്. ചൊവ്വാഴ്ച രാവിലെ ടാപ്പിംഗിനിടെയാണ് കാലായിൽ ടി.ജി.സുരേഷിന് പന്നിയുടെ ആക്രമണത്തിൽ കാലിന് ഗുരുതര പരിക്കേറ്റത്. ഇതിന് മുമ്പ് എസ്റ്റേറ്റ് റോഡിലൂടെ ബൈക്കിൽ സഞ്ചരിച്ചിരുന്ന ദമ്പതികളും ആക്രമണത്തിനിരയായി. പുർച്ചെയോടെയാണ് തൊഴിലാളികൾ റബർ ടാപ്പിംഗിനായി തോട്ടത്തിലെത്തുന്നത്. ഈ സമയം കടുത്ത മൂടൽമഞ്ഞായതിനാൽ വെളിച്ചം കുറവാണ്. കാട്ടുപന്നി അടുത്ത് എത്തിയ ശേഷമാണ് അറിയാൻ സാധിക്കുക. പലപ്പോഴും തലനാരിഴയ്ക്കാണ് തൊഴിലാളികൾ രക്ഷപ്പെടുന്നത്.

കൃഷിയും നശിപ്പിക്കുന്നു
എസ്റ്റേറ്റിന് പുറത്തുള്ള കൃഷിയിടങ്ങളിലെ കപ്പയും ,വാഴയും അടക്കം കാട്ടുപന്നികൾ നശിപ്പിക്കുന്നുണ്ട്. വൻനഷ്ടമാണ് കർഷകർക്ക് സംഭവിക്കുന്നത്. കൃഷി നാശത്തിന് തുച്ഛമായ തുകയാണ് ലഭിക്കുന്നത്. ഇതിനാകത്തെ നിരവധി നൂലാമാലകൾ ഉള്ളതിനാൽ ഏറിയ പങ്ക് കർഷകരും നഷ്ടപരിഹാരം മേടിക്കാറില്ല.