മുണ്ടക്കയം : ടൗണിലെ കച്ചവട സ്ഥാപനങ്ങളിലെയും വീടുകളിലെയും മാലിന്യങ്ങൾ ശേഖരിക്കാൻ തിരഞ്ഞെടുത്ത ഹരിതകർമ്മ സേനയ്ക്ക് പരിശീലനം ആരംഭിച്ചു. കടകളിലെ പ്ലാസ്റ്റിക് ഉൾപ്പെടെയുള്ള ഖരമാലിന്യങ്ങൾ എല്ലാ ദിവസവും രാവിലെ സേനാംഗങ്ങൾ എത്തി ശേഖരിക്കും. വീടുകളിൽ മാസത്തിൽ ഒരു പ്രാവശ്യം എത്തി മാലിന്യം ശേഖരിക്കും. കോസ് വേയിലെ മാർക്കറ്റ് കെട്ടിടത്തിന്റെ അടിയിലത്തെ നിലയിൽ പണികഴിപ്പിച്ചിട്ടുള്ള എം.സി.എഫിൽ എത്തിക്കുന്ന മാലിന്യം തരംതിരിച്ച് ക്ലീൻകേരള കമ്പനിക്ക് കൈമാറും. ഹരിത കേരള മിഷൻ പ്രവർത്തകരായ വിപിൻ, അരുൺ എന്നിവർ ക്ലാസ് എടുത്തു. പ്രസിഡന്റ് രേഖാ ദാസ് അദ്ധ്യക്ഷത വഹിച്ചു. വൈസ് പ്രസിഡന്റ് ദിലീഷ്, സ്റ്റാൻഡിംഗ് കമ്മിറ്റി ചെയർമാൻമാരായ സി.വി.അനിൽ കുമാർ, ബിൻസി, അംഗങ്ങളായ ഷീബ ,ജാൻസി , സിനിമോൾ , റേച്ചൽ, സൂസമ്മ, ജിനീഷ്, ജോമി , വി.ഇ.ഒ ജോബി, സി ഡി.എസ് ചെയർ പേഴ്സൻ പ്രമീള ബിജു, സുപ്രഭാ രാജൻ, ശ്രീദേവി എന്നിവർ പങ്കെടുത്തു. മാർച്ച് 1 മുതൽ ഹരിതകർമ്മ സേന പ്രവർത്തനം ആരംഭിക്കാനും , കടകളുടെ ലൈസൻസ് പുതുക്കുന്നതിന് ഹരിത കർമ്മസേന അംഗത്വം നിർബന്ധമാക്കാനും യോഗം തീരുമാനിച്ചു.