കട്ടപ്പന: നിയമസഭ തിരഞ്ഞെടുപ്പ് പ്രവർത്തനങ്ങൾക്ക് തുടക്കം കുറിച്ച് ഇൻഡോതിബറ്റൻ ബോർഡർ പൊലീസും കട്ടപ്പന പൊലീസും നഗരത്തിൽ സംയുക്ത റൂട്ട് മാർച്ച് നടത്തി. തിരഞ്ഞെടുപ്പിനോടനുബന്ധിച്ച് ജനങ്ങൾക്ക് സുരക്ഷ ബോധവത്കരണം നൽകുന്നതിനും ക്രമസമാധാനം ഉറപ്പാക്കുന്നതിനുമാണ് റൂട്ട് മാർച്ച് സംഘടിപ്പിച്ചത്. ഇടുക്കിക്കവലയിൽ നിന്ന് നഗരം ചുറ്റി കട്ടപ്പന സ്റ്റേഷനിൽ സമാപിച്ച മാർച്ചിൽ ഇൻഡോതിബറ്റൻ ബോർഡർ പൊലീസിന്റെ 91 അംഗ കമ്പനിയും കട്ടപ്പനയിലെ 40ൽപ്പരം പൊലീസ് ഉദ്യോഗസ്ഥരും പങ്കെടുത്തു. ഐ.ടി.ബി.പി. അസിസ്റ്റന്റ് കമാൻഡന്റ് ദയാലാ റാം, കട്ടപ്പന ഡിവൈ.എസ്.പി. ജെ. സന്തോഷ്‌കുമാർ എന്നിവർ നേതൃത്വം നൽകി.