ന്യൂഡൽഹി: ധനമന്ത്രി നിർമ്മല സീതാരാമൻ അവതരിപ്പിക്കുക പൂർണമായും പേപ്പർ രഹിത ബഡ്‌ജറ്റ്. ബഡ്‌ജറ്റ് അടങ്ങിയ ഇന്ത്യൻ നിർമ്മിത ടാബുമായാണ് ധനമന്ത്രി പാർലമെന്റിലേക്കെത്തിയത്. ബഡ്‌ജറ്റ് കോപ്പി വിതരണം ചെയ്യുന്നതും ഡിജിറ്റലായി ആയിരിക്കും. ധനമന്ത്രി ബഡ്‌ജറ്റ് അവതരണത്തിന് അനുമതി തേടി രാഷ്ട്രപതിയെ കണ്ടിരുന്നു. ബഡ്‌ജറ്റിന് മുന്നോടിയായുളള കേന്ദ്രമന്ത്രിസഭാ യോഗം ചേരുകയാണ്.
രാവിലെ 11ന് ബഡ്‌ജറ്റ് അവതരിപ്പിച്ച ശേഷം വിവരങ്ങൾ പ്രത്യേകം വികസിപ്പിച്ച ആപ്പിൽ ലഭ്യമാകും. ഗൂഗിൾ പ്ലേ സ്റ്റോറിൽ നിന്നും ആപ്പിൾ ആപ്പ് സ്റ്റോറിൽ നിന്നും ആപ്പ് ഡൗൺലോഡ് ചെയ്യാം. കൊവിഡ് പശ്ചാത്തലത്തിൽ മുമ്പൊരിക്കലുമുണ്ടാകാത്ത ബഡ്‌ജറ്റായിരിക്കുമെന്ന് ധനമന്ത്രി വ്യക്തമാക്കിയിട്ടുണ്ട്. രോഗബാധിതമായ സമ്പദ് വ്യവസ്ഥയ്ക്ക് സർക്കാരിന്റെ കൈത്താങ്ങ് ആവശ്യമാണ്. നിർമ്മാണ പ്രവർത്തനങ്ങൾ, ടൂറിസം, ഹോസ്പിറ്റാലിറ്റി, ബാങ്ക് വായ്പാ രംഗം എന്നിവ ആവശ്യാനുസരണം പുനരുജ്ജീവിപ്പിക്കുന്നതിന് അടിയന്തര നടപടികൾ ബ‌ഡ്‌ജറ്റിലുണ്ടാകുമെന്നാണ് പ്രതീക്ഷിക്കപ്പെടുന്നത്.