ന്യൂഡൽഹി: ഇസ്രയേൽ എംബസിക്ക് സമീപം കഴിഞ്ഞ ദിവസം സ്‌ഫോടനമുണ്ടായതിന്റെ പശ്ചാത്തലത്തിൽ പ്രധാനമന്ത്രി നരേന്ദ്രമോദിയുമായി ടെലഫോൺ സംഭാഷണം നടത്തി ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഇസ്രായേലി പ്രതിനിധികൾക്ക് സുരക്ഷ ഉറപ്പുവരുന്നതിനായി ഇന്ത്യ സ്വീകരിച്ച നടപടികൾക്ക് അദ്ദേഹം നരേന്ദ്രമോദിയോട് നന്ദി പറഞ്ഞു.
ഇന്ത്യയുടെ കൊവിഡ് പ്രതിരോധ പ്രവർത്തനങ്ങളെയും നെതന്യാഹു അഭിനന്ദിച്ചു. സ്വന്തം രാജ്യത്ത് വാക്‌സിൻ നിർമ്മിച്ച്, അത് വേഗത്തിൽ ജനങ്ങൾക്ക് ലഭ്യമാക്കിയതിനാണ് മോദിയെ നെതന്യാഹു അഭിനന്ദിച്ചത്. ഇസ്രയേലിലെ വാക്‌സിൻ വിതരണം വിജയകരമായതിന് മോദി നെതന്യാഹുവിനെയും അഭിനന്ദിച്ചു. വാക്‌സിൻ നിർമ്മാണത്തിലും വിതരണത്തിലും സാദ്ധ്യമായ സഹകരണങ്ങളെ കുറിച്ചും, വാക്‌സിൻ സർട്ടിഫിക്കറ്റുകളുടെ പരസ്പര അംഗീകാരത്തെ കുറിച്ചും ഇരുവരും ചർച്ച നടത്തി.