മൂന്നു നേരം ബിരിയാണി കിട്ടിയാൽ കുശാൽ എന്ന് ചിന്തിക്കുന്ന ആളാണോ നിങ്ങൾ? വെറൈറ്റി ബിരിയാണി കഴിക്കാൻ എത്ര പണം വേണോ മുടക്കാൻ യാതൊരു മടിയും ഇല്ലാത്ത കൂട്ടത്തിലാണോ? എങ്കിൽ നിങ്ങൾ തീർച്ചയായും രുചിച്ചിരിക്കേണ്ട ഒന്നാണ് ദുബായിയിലെ ഇന്ത്യൻ ഭക്ഷണ ശാലയായ ബോംബെ ബോറോ ഹോട്ടലിലെ ബിരിയാണി. ലോകത്തിലെ ഏറ്റവും വിലയേറിയ ബിരിയാണിയാണ് ഇവിടെ വിളമ്പുന്നത്.

റോയൽ ഗോൾഡ് ബിരിയാണി എന്ന് പേരിട്ടിരിക്കുന്ന ബിരിയാണി ചില്ലറക്കാരനല്ല. ഈ ബിരിയാണിയിൽ 23 കാരറ്റ് സ്വർണം വരെയുണ്ട്. 1000 ദിർഹം (ഏകദേശം 20,000) രൂപയാണ് റോയൽ ഗോൾഡ് ബിരിയാണിയുടെ വില. നാല് മുതൽ ആറ് പേർക്ക് വരെ കഴിക്കാവുന്ന റോയൽ ഗോൾഡ് ബിരിയാണി തയ്യാറാക്കാൻ 45 മിനിറ്റ് വേണം. ഭക്ഷണശാലയുടെ ഒന്നാം വാർഷികത്തിന്റെ ഭാഗമായി അവതരിപ്പിച്ചിരിക്കുന്ന റോയൽ ഗോൾഡ് ബിരിയാണിയിൽ അടങ്ങിയിരിക്കുന്ന വിഭവങ്ങൾ നിങ്ങളുടെ വായിൽ കപ്പലോടിക്കാനുള്ള വെള്ളം നിറയ്ക്കും എന്ന കാര്യത്തിൽ സംശയം വേണ്ട.

കശ്മീരി ലാമ്പ് സീക്ക് കബാബ്, ഓൾഡ് ദില്ലി ലാമ്പ് ചോപ്‌സ്, രാജ്പുത്ത് ചിക്കൻ കബാബ്, മുഗളായ് കോഫ്ത, മലായ് ചിക്കൻ എന്നിവയാണ് റോയൽ ഗോൾഡ് ബിരിയാണിയിലെ നോൺ-വെജ് വിഭവങ്ങൾ. കുങ്കുമം ചേർത്ത ബിരിയാണി വലിയ തളികയിലാക്കി അതിനു മുകളിലാണ് ഈ വിഭവങ്ങൾ വിളമ്പുന്നത്. ഗാർണിഷിംഗിനായി 23 കാരറ്റ് ഭക്ഷ്യയോഗ്യമായ സ്വർണവും ഉപയോഗിച്ചിട്ടുണ്ട്. വിവിധ തരത്തിലുള്ള സോസുകൾ, കറികൾ, സാലഡുകൾ എന്നിവയും റോയൽ ഗോൾഡ് ബിരിയാണിയുടെ ഭാഗമാണ്.

ബാഹുബലി താലി

ഇനി അഥവാ നിങ്ങൾക്ക് റോയൽ ഗോൾഡ് ബിരിയാണി ഇഷ്ടപ്പെട്ടില്ലെങ്കിൽ ദുബായിൽ,​ ഉറപ്പായും പോയിരിക്കേണ്ട മറ്റൊരു സ്ഥലമുണ്ട്. പൊന്നുസാമി റെസ്റ്റോറന്റ്. ബാഹുബലി താലിയാണ് അവിടുത്തെ സ്പെഷ്യൽ വിഭവം. സൂപ്പും സ്റ്റാർട്ടറും മെയിൻ കോഴ്സും മധുരവുമടങ്ങുന്ന ഒരു വമ്പൻ താലിയാണ് ബാഹുബലി താലി. മീൻ ഫ്രൈ, ചെമ്മീൻ ഫ്രൈ, തന്തൂരി ചിക്കൻ, കൂൺ ഫ്രൈ എന്നിവയാണ് സ്റ്റാർട്ടറുകൾ. റൊട്ടി, പൊറോട്ട, ചോറ്, രസം, സാമ്പാർ, പച്ചക്കറികൾ, അച്ചാർ എന്നിങ്ങനെ വിഭവ സമൃദ്ധമാണ് മെയിൻ കോഴ്സ്. ഗുലാബ് ജാമുനും സുപാരിയും ചേർന്ന മധുരവും ബാഹുബലി താലിയിലുണ്ട്. 135 ദിർഹം അതായത് ഏകദേശം 2,690 രൂപയാണ് ബാഹുബലി താലിയുടെ വില.