കണ്ണൂർ: തളിപ്പറമ്പിൽ മന്ത്രിമാർ പങ്കെടുക്കുന്ന പരിപാടിയിൽ വൻ ആൾക്കൂട്ടം. കൊവിഡ് മാനദണ്ഡം പാലിക്കാതെ ജനങ്ങൾ തിക്കിത്തിരക്കിയത് വലിയ വിവാദത്തിനാണ് വഴിമരുന്നിട്ടിരിക്കുന്നത്. സാമൂഹിക അകലം പാലിക്കാതെയുളള ജനക്കൂട്ടത്തെ നിയന്ത്രിക്കാൻ പൊലീസിനും ആകുന്നില്ല. മന്ത്രിമാരായ കെ കെ ശൈലജ, ഇ പി ജയരാജൻ, കടന്നപ്പളളി രാമചന്ദ്രൻ എന്നിവരാണ് അദാലത്തിൽ പങ്കെടുക്കുന്നത്.
അതേസമയം, സംഭവത്തെ കുറിച്ച് ഒന്നും പറയാനില്ലെന്നാണ് തളിപ്പറമ്പ് ഇൻസ്‌പെക്‌ടർ സത്യനാഥിന്റെ പ്രതികരണം. മാദ്ധ്യമങ്ങളോട് ഒന്നും വിശദീകരിക്കേണ്ട ആവശ്യമില്ലെന്നും അദ്ദേഹം പ്രതികരിച്ചു. തിരഞ്ഞെടുപ്പ് കാലത്തിന്റെ തുടക്കത്തിൽ തന്നെ കൊവിഡ് ചട്ടങ്ങൾ മറികടന്ന് രാഷ്ട്രീയ നേതാക്കൾ നടത്തുന്ന നീക്കങ്ങളിൽ വലിയ ആക്ഷേപങ്ങൾ ഉയർന്നിരുന്നു. ഭരണ-പ്രതിപക്ഷ പരിപാടികളിലും സർക്കാർ പരിപാടികളിലും കൊവിഡ് ചട്ടങ്ങൾ കാറ്റിൽ പറത്തുകയാണ്.
ആലപ്പുഴ എടത്വായിൽ മന്ത്രിമാർ പങ്കെടുക്കുന്ന അദാലത്തിൽ കൊവിഡ് പ്രോട്ടോക്കോൾ ലംഘിച്ച് വൻ ആൾക്കൂട്ടം എത്തിയതും പ്രതിപക്ഷ നേതാവിന്റെ ഐശ്വര്യ കേരള യാത്രയിൽ ആളുകൾ തിക്കിത്തിരക്കിയതും വലിയ ചർച്ചയായിരുന്നു. രാഷ്ട്രീയ നേതാക്കൾ പരസ്‌പരം ആരോപണം ഉന്നയിക്കുകയെന്നല്ലാതെ കൊവിഡ് മാനദണ്ഡവുമായി പാലിക്കുന്നതുമായി ബന്ധപ്പെട്ട യാതൊരു നടപടിയും സ്വീകരിക്കാൻ ഇതുവരെ തയ്യാറായിട്ടില്ല.