കേരളത്തിലെ പാമ്പുകളെ കുറിച്ച് സമഗ്രമായ വിവരം ലഭിക്കുന്ന മൊബൈൽ ആപ്പ് യാഥാർത്ഥ്യമായിരിക്കുകയാണ്. സ്നേക്ക്പീഡിയ എന്ന് പേരിട്ടിരിക്കുന്ന ആപ്പിൽ കേരളത്തിൽ കാണുന്ന നൂറിലധികം തരം പാമ്പുകളുടെ എഴുനൂറിലധികം ചിത്രങ്ങളുണ്ട്. 2016-ൽ രൂപീകരിച്ച ഒരു വാട്സ്ആപ്പ് ഗ്രൂപ്പ് അടിസ്ഥാനമാക്കി ഒരുകൂട്ടം ഡോക്‌ടർമാരും ഗവേഷകരും അഞ്ച് രാജ്യങ്ങളിലിരുന്നാണ് ആപ്ളിക്കേഷൻ വികസിപ്പിച്ചത്.

നിങ്ങൾ ഒരു പാമ്പിനെ കണ്ടു എന്നിരിക്കട്ടെ. തിരിച്ചറിയാൻ സാധിക്കുന്നില്ല എങ്കിൽ ഒരു ഫോട്ടോ എടുത്ത് ആപ്പിൽ അയച്ചു നൽകിയാൽ വൈകാതെ മറുപടി ലഭിക്കും. പാമ്പുകടിയേറ്റാൽ; ശാസ്ത്രീയമായ ചികിത്സാ സൗകര്യങ്ങളുള്ള കേരളത്തിലെ 158 ആശുപത്രികളുടെ ജില്ല തിരിച്ചുള്ള ലിസ്റ്റ്, ശാസ്ത്രീയമായ ചികിത്സയുടെ പ്രാധാന്യത്തെ കുറിച്ച് അനുഭവ പരിചയം ഉള്ള ഡോക്ടർമാർ ചേർന്നെഴുതിയ ലേഖനങ്ങൾ, പൊതുവായ അറിവുകൾക്കായി ഇൻഫോ എന്ന ഒരു മെനു, പാമ്പു കടി ഒഴിവാക്കാൻ നമുക്ക് ചെയ്യാൻ സാധിക്കുന്ന കാര്യങ്ങൾ, പാമ്പുകളെ തിരിച്ചറിയുന്നത് എങ്ങനെ എന്നിങ്ങനെ മേഖലയിലെ വിദഗ്‌ദ്ധർ ചേർന്ന് തയ്യാറാക്കിയ ലേഖനങ്ങൾ ആപ്പിൽ ഉൾക്കൊള്ളിച്ചിട്ടുണ്ട്. ഇതുകൂടാതെ, പാമ്പുകളെ ചുറ്റിപ്പറ്റി കേരളത്തിൽ പ്രചാരത്തിലുള്ള കെട്ടുകഥകൾക്കും അന്ധവിശ്വാസങ്ങൾക്കും പിന്നിലുള്ള സത്യവും ഇതിൽ ഉൾപ്പെടുത്തിയിരിക്കുന്നു.

സ്നേക്ക്പീഡിയയുടെ പിന്നണിപ്രവർത്തകരിലൊരാളായ ജിനീഷിന്റെ ഫേസ്ബുക്ക് കുറിപ്പ് വായിക്കാം-

വളരെയധികം സന്തോഷത്തോടെയും അഭിമാനത്തോടെയും എഴുതുന്ന പോസ്റ്റാണ്. അഞ്ചു വർഷം മുൻപ് തുടങ്ങിയ ഒരു ഉദ്യമം പൂർത്തീകരിക്കുന്ന ദിവസം. വലിയ സംഭവമൊന്നുമല്ല. പക്ഷേ, ഞങ്ങൾ കുറച്ചു പേരുടെ വലിയൊരു സ്വപ്നമായിരുന്നു.

കേരളത്തിലെ പാമ്പുകളെ കുറിച്ച് സമഗ്രമായ ഒരു ആൻഡ്രോയ്ഡ് ആപ്പ്, മലയാളത്തിന് പ്രാധാന്യം നൽകികൊണ്ട് ഒന്ന്. ആ ലക്ഷ്യം യാഥാർഥ്യമായി. ഇനി വിലയിരുത്തേണ്ടത് നിങ്ങളാണ്. ഞങ്ങൾക്ക് സാധിക്കാവുന്ന എല്ലാ കാര്യങ്ങളും ചെയ്തിട്ടുണ്ട്.

Snakepedia 90 ശതമാനവും ഒരു ഓഫ്‌ലൈൻ ആപ്പാണ്.

പ്ലേസ്റ്റോറിൽ നിന്നും ഡൗൺലോഡ് ചെയ്യാനുള്ള ലിങ്ക്: https://play.google.com/store/apps/details?id=app.snakes

കേരളത്തിൽ കാണുന്ന നൂറിലധികം തരം പാമ്പുകളുടെ എഴുനൂറിലധികം ചിത്രങ്ങൾ. ഓരോ സ്പീഷീസിനെ കുറിച്ചും ലളിതമായ വിവരണം. സാധാരണ പുസ്തകങ്ങളിലും ആപ്പുകളും കാണുന്ന രീതിയിലുള്ള സ്കെയിൽ കൗണ്ട് ഒന്നും ഉൾപ്പെടുത്തിയിട്ടില്ല. അല്പം അകലെ ഒരു പാമ്പിനെ കണുന്ന ഒരു സാധാരണക്കാരനെ തിരിച്ചറിയാൻ സഹായിക്കുക എന്നത് മാത്രമാണ് ലക്ഷ്യം. അതുകൊണ്ട് തന്നെ വിവരങ്ങളിൽ സാങ്കേതിക പദങ്ങൾ ഏതാണ്ട് പൂർണമായും ഒഴിവാക്കി.

2016-ൽ രൂപീകരിച്ച ഒരു വാട്സ്ആപ്പ് ഗ്രൂപ്പിൽ ഒരുകൂട്ടം ഡോക്ടർമാരും ഗവേഷകരും അഞ്ച് രാജ്യങ്ങളിൽ ആയിരുന്ന് തയ്യാറാക്കിയതാണ് ഈ വിവരണങ്ങൾ. വിവരണം മാത്രമല്ല അവയുടെ ഓഡിയോയും കേൾക്കാം. വിവരണങ്ങൾ ഇംഗ്ലീഷിലും മലയാളത്തിലും ലഭ്യമാണ്.

പാമ്പുകളുടെ വിവരണങ്ങളിലെ ഇംഗ്ലീഷ് പോഡ്കാസ്റ്റ് ചെയ്തിരിക്കുന്നത് മൂന്ന് സ്കൂൾ വിദ്യാർഥിനികൾ ആണ്. ജാലുവും നിനയും സ്നിയയും. അല്പം വ്യത്യസ്തമായ ആക്സന്റ് ആയിരിക്കും, ഒന്ന് കേട്ട് നോക്കൂ.

കേരളത്തിൽ സാധാരണ കാണുന്ന പാമ്പുകളുടെ ഓരോന്നിന്റെയും ഇരുപതോളം ചിത്രങ്ങൾ. ചില പാമ്പുകളുടെ 20 നിറഭേദങ്ങൾ ഉൾപ്പെടുത്താൻ സാധിച്ചിട്ടുണ്ട് എന്നതിൽ സന്തോഷമുണ്ട്.

ഓരോ സ്പീഷീസിനെയും തിരിച്ചറിയാനായി ഐഡി ടിപ്സ് ഇൻഫോ ഗ്രാഫിക്സ് ഉൾപ്പെടുത്തിയിട്ടുണ്ട്. ഓരോന്നും സൂം ചെയ്ത് വ്യക്തമായി കാണാം. മാസങ്ങൾ നീണ്ട പരിശ്രമമാണ് ആ ഇൻഫോ ഗ്രാഫിക്സ്. മൂന്നു രാജ്യങ്ങളിലായിരുന്ന് നാലഞ്ചു പേർ രാപകലില്ലാതെ അധ്വാനിച്ചതിന്റെ ഫലം. ഇതിലും സാങ്കേതിക വിവരണങ്ങൾ അധികം ഉൾപ്പെടുത്തിയിട്ടില്ല.

സ്വൈപ്പ് ചെയ്തു സ്പീഷീസ് മാറ്റാം.

വിഷമുള്ള പാമ്പുകളെ പോലെ തന്നെ കാഴ്ചയിൽ തോന്നിക്കുന്ന വിഷമില്ലാത്ത പലതരം പാമ്പുകൾ ഉണ്ട്. അവയെ എങ്ങനെ തിരിച്ചറിയാം എന്നതിന് വേണ്ടി മാത്രമായി ഒരു മെനു. ഇൻഫോ ഗ്രാഫിക്സ് ആണ്. സൂം ചെയ്ത് വിശദമായി കാണാം.

കേരളത്തിൽ കാണുന്ന പാമ്പുകളിൽ അപകടകാരികളായ 20 പാമ്പുകളുടെ മാത്രം ഒരു മെനു. അപകടകാരികൾ അല്ലാത്ത പാമ്പുകൾക്ക് ആയി മറ്റൊരു മെനു.

നിങ്ങൾ ഒരു പാമ്പിനെ കണ്ടു എന്നിരിക്കട്ടെ. നിങ്ങൾക്ക് തിരിച്ചറിയാൻ സാധിക്കുന്നില്ല എങ്കിൽ ഒരു ഫോട്ടോ എടുത്ത് ഞങ്ങൾക്ക് അയച്ചു തരൂ. ഈ ആപ്പിൽ അതിനുള്ള സൗകര്യം ഉണ്ട്. വൈകാതെ മറുപടിയും ലഭിക്കും. ഈ ആപ്പിൽ തന്നെ. ഈ സൗകര്യം ഉപയോഗിക്കണമെങ്കിൽ ഓൺലൈൻ ആവണം എന്നുമാത്രം. ഒരു കാര്യം കൂടി, പാമ്പ് കടിയേറ്റ അവസ്ഥയിലാണെങ്കിൽ എത്രയും പെട്ടെന്ന് ചികിത്സ തേടുക. പാമ്പ് കടിയേറ്റ അവസരങ്ങളിൽ മറുപടി കിട്ടാൻ വേണ്ടി കാത്തു നിൽക്കരുത്. വിലയേറിയ സുവർണ്ണ നാഴികകൾ നഷ്ടപ്പെടുത്തരുത്.

പ്രഥമ ശുശ്രൂഷ; ഡോക്ടർമാർ ചേർന്ന് എഴുതിയ ലേഖനം. പുസ്തകങ്ങളിൽ വായിക്കുന്ന അറിവുകൾക്ക് പുറമേ അനുഭവ പരിചയം കൂടി ഉൾപ്പെടുത്തി തയ്യാറാക്കിയ ലേഖനം.

പാമ്പുകടിയേറ്റാൽ; ശാസ്ത്രീയമായ ചികിത്സാ സൗകര്യങ്ങളുള്ള കേരളത്തിലെ 158 ആശുപത്രികളുടെ ജില്ല തിരിച്ചുള്ള ലിസ്റ്റ്. ആശുപത്രിയുടെ ഫോൺ നമ്പറും കൂടെയുണ്ട്, ആവശ്യം ഉണ്ടായാൽ വിളിച്ച് അന്വേഷിച്ച ശേഷം പോകാം. നിങ്ങളുടെ ഏറ്റവും അടുത്തുള്ള ആശുപത്രികളുടെ ലിസ്റ്റ് പ്രത്യേകം കാണിക്കും. മാത്രമല്ല, നിങ്ങൾ തെരഞ്ഞെടുക്കുന്ന ആശുപത്രിയിലേക്കുള്ള വഴിയും ഉണ്ട്, ഗൂഗിൾ മാപ്പിന്റെ സഹായത്തോടെയാണത്. മിക്ക ജില്ലകളുടെയും ആശുപത്രികളുടെ പട്ടിക തയ്യാറാക്കിയത് അതാത് ജില്ലകളിൽ ജോലി ചെയ്യുന്ന ഡോക്ടർമാർ ചേർന്ന്.

പാമ്പുകടിയേറ്റാൽ ശാസ്ത്രീയമായ ചികിത്സയുടെ പ്രാധാന്യം. അനുഭവ പരിചയം ഉള്ള ഡോക്ടർമാർ ചേർന്ന് എഴുതിയ ലേഖനങ്ങൾ. ഇതിനായി മാത്രം ഒരു മെനു.

പൊതുവായ അറിവുകൾക്കായി ഇൻഫോ എന്ന ഒരു മെനു. പാമ്പു കടി ഒഴിവാക്കാൻ നമുക്ക് ചെയ്യാൻ സാധിക്കുന്ന കാര്യങ്ങൾ മാത്രം ഉൾപ്പെടുത്തിയ ഒരു ലേഖനം. പാമ്പുകളെക്കുറിച്ച് സാധാരണക്കാർക്ക് മനസ്സിലാകുന്ന ലളിതമായ ഭാഷയിൽ ഒരു ആമുഖം. പാമ്പുകളെ തിരിച്ചറിയുന്നത് എങ്ങനെ എന്ന ഒരു ലേഖനം. മേഖലയിലെ വിദഗ്ധർ ചേർന്ന് തയ്യാറാക്കിയ ലേഖനങ്ങൾ.

കേരളത്തിൽ പ്രചാരത്തിലുള്ള കെട്ടുകഥകളും അന്ധവിശ്വാസങ്ങളും, ഒരു പൊളിച്ചടുക്കൽ. ഇതിനായി മാത്രം ഒരു മെനു.

ഇവയൊക്കെ നിങ്ങൾക്ക് കേൾക്കുകയും ചെയ്യാം. എല്ലാ ലേഖനങ്ങളും ഇംഗ്ലീഷിലും മലയാളത്തിലും ലഭ്യമാണ്. ഓഡിയോയും രണ്ടു ഭാഷയിലും ലഭ്യമാണ്. ഓഡിയോ കേൾക്കണമെങ്കിൽ ഓൺലൈൻ ആവണം എന്ന് മാത്രം.

കേരളത്തിൽ പാമ്പുകളെ റെസ്ക്യൂ ചെയ്യാൻ വനം വകുപ്പിൻറെ പരിശീലനം ലഭിച്ച, ലൈസൻസ് ലഭിച്ച എണ്ണൂറിലധികം പേരുടെ ജില്ലതിരിച്ചുള്ള വിവരങ്ങൾ. നിങ്ങളുടെ പരിസരത്ത് ഒരു പാമ്പിനെ കണ്ടാൽ ഇവരുടെ സഹായം തേടാം.

ലേഖനങ്ങളുടെ പോഡ്കാസ്റ്റ് കേൾക്കാൻ വേണ്ടി മാത്രമായി ഒരു മെനുവും ഉണ്ട്.

അഞ്ചു വർഷങ്ങൾക്ക് മുൻപ് തുടങ്ങിയ ജോലി ഊർജ്ജിതമായത് ഈ കോവിഡ് കാലത്താണ്. ഓരോ ദിവസവും നാലും അഞ്ചും മണിക്കൂർ നീണ്ട ഗൂഗിൾ മീറ്റ്. ഇത് തുടർച്ചയായി പല ആഴ്ചകൾ നീണ്ടു. അങ്ങനെയാണ് ഇൻഫോ ഗ്രാഫിക്സും മറ്റും ചെയ്തത്.

കേരളത്തിന് അകത്തും പുറത്തുമുള്ള 130 ഫോട്ടോഗ്രാഫർമാർ പകർത്തിയ പാമ്പുകളുടെ ചിത്രങ്ങളുണ്ട്.

ഞങ്ങൾക്ക് സാധിക്കുന്നതിന്റെ പരമാവധി ചെയ്തു. ഇനി നിങ്ങൾ വിലയിരുത്തൂ...

അടുത്തത് ആർട്ടിഫിഷ്യൽ ഇൻറലിജൻസ് ഫീച്ചർ ഉപയോഗിച്ച് പാമ്പുകളെ തിരിച്ചറിയാനുള്ള ഓഫ് ലൈൻ ഫീച്ചർ തയ്യാറാക്കാനുള്ള ശ്രമമാണ്. നിങ്ങളുടെ സഹകരണം ഉണ്ടെങ്കിൽ വൈകാതെ അതും ഉൾപ്പെടുത്താൻ സാധിക്കും എന്ന് കരുതുന്നു.

ആപ്പ് ഫ്രീ ആണ്.

ആത്മവിശ്വാസത്തോടെ ഒരു അഭ്യർത്ഥന...

ഇതൊന്ന് ഇൻസ്റ്റോൾ ചെയ്യണം, ഇഷ്ടപ്പെട്ടെങ്കിൽ നിങ്ങളുടെ സുഹൃത്തുക്കൾക്ക് നിർദ്ദേശിക്കണം. ഞങ്ങളുടെ വർഷങ്ങളുടെ പ്രയത്നമാണ്... സ്വപ്നമാണ്...

സഹകരണം പ്രതീക്ഷിച്ചുകൊണ്ട് നിർത്തട്ടെ, നന്ദി