ആലപ്പുഴ: കെ സുധാകരനോട് ക്ഷമ ചോദിച്ച് ഷാനിമോൾ ഉസ്‌മാൻ എം എൽ എ. സുധാകരനെതിരെ നടത്തിയ പരാമർശം വിവാദമായതിൽ വലിയ വിഷമമുണ്ടെന്നാണ് എം എൽ എയുടെ ഫേസ്‌ബുക്ക് കുറിപ്പ്. മന്ത്രി സുധാകരൻ തന്നെയും ലതികാ സുഭാഷിനെയും വിജയരാഘവൻ രമ്യ ഹരിദാസ് എം പി യേയും വ്യക്തിപരമായി അധിക്ഷേപിച്ചപ്പോൾ താനടക്കം ഉളളവർക്കുണ്ടാക്കിയിട്ടുളള മനപ്രയാസവും പ്രതിഷേധവും മായാതെ നിൽക്കുന്നത് കൊണ്ട് തന്റെ പാർട്ടിയുടെ ആരും ഇത്തരത്തിൽ പ്രതികരിക്കരുതെന്ന് ആഗ്രഹിച്ചിരുന്നുവെന്നാണ് ഷാനിമോൾ ഫേസ്ബുക്ക് കുറിപ്പിൽ പറയുന്നത്.

എംപി യോട് ഒന്ന് ഫോണിൽ സംസാരിക്കാതെ പോലും പെട്ടെന്ന് പ്രതികരിച്ചത് തന്റെ പിഴവാണ്. വ്യക്തിപരമായ പ്രയാസത്തിൽ താൻ ക്ഷമ ചോദിക്കുന്നുവെന്നും ഒപ്പം പ്രതികരണത്തിലൂടെ കോൺഗ്രസ്‌ നേതാക്കൾക്കും പ്രവർത്തകർക്കുമുണ്ടായ പ്രയാസത്തിൽ ഖേദം പ്രകടിപ്പിക്കുന്നുവെന്നും ഷാനിമോൾ പറയുന്നു. താൻ നടത്തിയ പ്രതികരണത്തിൽ പാർട്ടിയുടെ ഒരു നേതാവിനും യാതൊരു ബന്ധവുമില്ലെന്നും ഷാനിമോൾ ഉസ്‌മാൻ വ്യക്തമാക്കി.

മുഖ്യമന്ത്രിക്കെതിരായി സുധാകരൻ നടത്തിയ പരാമർശം വിവാദമായപ്പോൾ അദ്ദേഹത്തിനെതിരെ ഷാനിമോൾ ഉസ്‌മാൻ രംഗത്ത് വന്നിരുന്നു. എം എൽ എയുടെ പരസ്യപ്രസ്‌താവനയ്‌ക്ക് പിന്നിൽ പാർട്ടിയിലെ തന്നെ ചില നേതാക്കൾ ഉണ്ടായിരുന്നുവെന്നാണ് സുധാകരൻ പറഞ്ഞത്.

ഫേസ്‌ബുക്ക് കുറിപ്പിന്റെ പൂർണരൂപം

കഴിഞ്ഞ ദിവസം ഞാൻ ബഹുമാന്യ ശ്രീ കെ സുധാകരൻ എം പി നടത്തിയ ഒരു പ്രസംഗത്തോടനുബന്ധിച്ചു ഒരു ചാനലിൽ നൽകിയ പ്രതികരണം വലിയ വിവാദമായതിൽ വലിയ വിഷമമുണ്ട്. മന്ത്രി ശ്രീ സുധാകരൻ എന്നെയും ശ്രീ V. S ലതികാ സുഭാഷിനെയും ശ്രീ വിജയരാഘവൻ രമ്യ ഹരിദാസ് എം. പി യേയും കൂടാതെ നിരവധി വ്യക്തിപരമായ പരാമർശങ്ങൾ ഞാനടക്കം ഉള്ളവർക്കുണ്ടാക്കിയിട്ടുള്ള മനപ്രയാസവും പ്രതിഷേധവും മായാതെ നിൽക്കുന്നത് കൊണ്ട്, എന്റെ പാർട്ടിയുടെ ആരും ഇത്തരത്തിൽ പ്രതികരിക്കരുതെന്ന് ആഗ്രഹിച്ചിരുന്നു, ആയതിനാൽ ബഹു. K. സുധാകരൻ എംപി യോട് ഒന്ന് ഫോണിൽ സംസാരിക്കാതെ പോലും പെട്ടെന്ന് പ്രതികരിച്ചത് എന്റെ പിഴവാണ്. എന്റെ രാഷ്ട്രീയ പ്രവർത്തനത്തിൽ ഏറെ പിന്തുണയും പ്രോത്സാഹനവും നൽകുകയും അരൂർ ബൈ ഇലക്ഷനിൽ പോലും ദിവസങ്ങളോളം എന്റെ വിജയത്തിന് വേണ്ടി പ്രവർത്തിക്കുകയും ചെയ്ത ബഹു കെ സുധാകരൻ അവർക്കൾക്കുണ്ടായ വ്യക്തിപരമായ പ്രയാസത്തിൽ ഞാൻ ക്ഷമ ചോദിക്കുന്നു ഒപ്പം എന്റെ പ്രതികരണത്തിലൂടെ കോൺഗ്രസ്‌ നേതാക്കൾക്കും പ്രവർത്തകർക്കുമുണ്ടായ പ്രയാസത്തിൽ ഞാൻ ഖേദം പ്രകടിപ്പിക്കുന്നു, ഞാൻ നടത്തിയ പ്രതികരണത്തിൽ പാർട്ടിയുടെ ഒരു നേതാവിനും യാതൊരു ബന്ധവുമില്ല എന്നും അറിയിക്കുന്നു, ഈ വിവാദം ഇവിടെ അവസാനിപ്പിക്കണമെന്ന് അഭ്യർത്ഥിക്കുന്നു.