മുംബയ്: ഇന്ത്യയുടെ വിദേശ നാണയ കരുതൽ ശേഖരം ജനുവരി 29ന് സമാപിച്ച വാരത്തിൽ 485 കോടി ഡോളറിന്റെ വർദ്ധനയുമായി എക്കാലത്തെയും ഉയരമായ 59,​018 കോടി ഡോളറിലെത്തി. ശേഖരം 59,​000 കോടി ഡോളർ കടക്കുന്നതും ആദ്യമാണ്. മുൻവർഷത്തെ സമാനകാലത്തെ അപേക്ഷിച്ച് ശേഖരത്തിലുണ്ടായ വർദ്ധന 11,​900 കോടി ഡോളറാണ്. തൊട്ടുമുമ്പത്തെ ആഴ്‌ചയിൽ 109 കോടി ഡോളറിന്റെ വർദ്ധനയും ശേഖരം കുറിച്ചിരുന്നു.

ശേഖരത്തിൽ മുഖ്യപങ്കുവഹിക്കുന്ന വിദേശ നാണയ ആസ്‌തി കഴിഞ്ഞവാരം 503 കോടി ഡോളർ ഉയർന്ന് 54,​722 കോടി ഡോളറായെന്ന് റിസർവ് ബാങ്കിന്റെ കണക്കുകൾ വ്യക്തമാക്കി. ഡോളറിലാണ് വ്യക്തമാക്കുന്നതെങ്കിലും കരുതൽ നാണയശേഖരത്തിൽ യൂറോ,​ യെൻ,​ പൗണ്ട് തുടങ്ങിയവയുമുണ്ട്. അതേസമയം,​ കഴിഞ്ഞവാരം ഇന്ത്യയുടെ കരുതൽ സ്വർണശേഖരം 16.4 കോടി ഡോളർ താഴ്‌ന്ന് 3,​629 കോടി ഡോളറായി.